189 Бардыгы /

Катарынан сел жүргөн Ош облусунун Кара-Суу, Алай, Араван, Өзгөн, Ноокат райондорунда, Баткен облусунун Лейлек, Кадамжай жана башка райондорунда жолдорду кайрадан калыбына келтирүү, тазалоо иштери улантылууда. Бул тууралуу Транспорт жана коммуникациялар министрлигинен билдиришти.

Маалыматка караганда, ушул тапта Жалал-Абад – Казарман (63-98-чакырымдар аралыгы), Ноокат-Араван (9-чакырымы), Мырзаке – Кара-Шоро (49-51-чакырымдар аралыгы) унаа жолдору убактылуу жабык. Жеринде аймакты тейлеген жолчулар жана атайын техникалар иштеп жатат. Ак-Терек – Папан – Кожокелең (1-чакырымы), Ош – Төлөйкөн (7,4 жана 8,5-чакырымы), Топ-Жаңгак – Кара-Суу, Тамаша – Кызыл-Булак (7 жана 16-17-чакырымдар аралыгы), Бишкек – Ош (660-чакырымы), Ош – Баткен – Раззаков (63 жана 57-58-чакырымдар аралыгы), Ош – Сары-Таш – Эркечтам (42-44-чакырымдар аралыгы) жана башка сел жүргөн унаа жолдор тазаланып, каттам берилди.

Азыркы тапта бир тараптуу болгон жолдорду кеңейтүү, суу жеп кеткен тилкелерди калыбына келтирүү иштери абдан кызуу жүрүүдө. Эске салчу жагдай: аба ырайынын ыкчам жана дагы катаал өзгөрүшүнөн улам ушул жылдын 13-17-июль күндөрү өлкөбүздүн тоолуу жана тоо этектериндеги райондордо катарынан сел жүрүп, дарыяларда суунун деңгээли көтөрүлүшү мүмкүндүгү маалымдалган.

Мындан улам Транспорт жана коммуникациялар министрлигине караштуу Жол тейлөө ишканалары өздөрүнө бөлүнгөн аймакты толук көзөмөлдөп, жаралган кырдаалга ыкчам аракет көрүп жаткандыгы айтылды.

Алишер ТОКСОНБАЕВ, өз кабарчы