336 Бардыгы /

Ошто 50 чакты ишкер нааразылык акциясына чыгышып, сел каптаган борбордук базарды башка жакка көчүрүүнүн мөөнөтүн узартып берүүнү бийликтен абдан катуу суранып жатышат. Алар базарды жылдырууга каршы эмес экендигин айтышып, сезон маалында бир-эки ай ошол жерде иштеп турууга мүмкүнчүлүк берүүнү дагы өтүнүштү.

Айтмакчы, атайын акцияга чыккандар “Элдин үнүн уккула!”, “Президент Жапаров, элдин үнүн угуңуз!” деген плакаттарды көтөрүп чыгышты. Соодагерлер борбордук базардан Ош мэриясынын имаратын карай жөнөп кетишти. Алар ушул жылдын 20-июлунда дагы аргасыздан көчөгө чыгышкан.

Анткени, ушул жылдын 14-июлунда орун алган селдин кесепетинен Ош шаарындагы борбордук базарды, анан дагы калаанын чет жакасындагы айылдарды сел суулары каптаган. Анын кесепетинен Төлөйкөн айылындагы “Мөл-Булак” эс алуу борборунда бир үй-бүлөнүн мүчөлөрүн – 4 адамды, ошондой эле борбордук базарда бир аялды дароо сел агызып кеткен. Бул табигый кырсыктан беш киши каза таап, бир нече машинени сел агызып, үйлөр, көпүрө, жолдор заматта жарактан чыккан эле. Соодагерлер дагы чоң чыгымга учураган. Ош шаарында жана Кара-Суу районунда жүздөгөн турак жайлар зыян тартты. Ушундан кийин Ош шаарынын мэриясы борбордук базар коопсуз жайга Жапалак айылынын Көкүмбий көчөсүнө көчүрүлө тургандыгын билдирген. Ал эми 19-июлда шаар башчысы Бакытбек Жетигенов дагы базар көчүрүлө турган жер тилкесин жеринен көрүп чыккан. Маалыматта айтылгандай, жаңы базар Ош автоунаа базарынын жанындагы эле 16,7 гектар жер тилкесине жайгашат. Тиешелүү кызматтарга базарды көчүрүү боюнча даярдык иштерин баштоо тапшырмасы берилди.

Дал ушунун алдында Улуттук коопсуздук мамлекеттик комитетинин төрагасы Камчыбек Ташиев Ош шаарында селден жабыркагандарга жеринде жолугуп, борбордук базар сентябрдан башка жерге көчүрүлө тургандыгын шардана кылган. Кыргыз Өкмөт башчысынын орун басары Ак-Буура суусунун боюна салынган мыйзамсыз курулуштар, көпүрөлөр жана эс алуучу жайлар дагы биротоло тазалана тургандыгын айткан жайы бар. 

Алишер ТОКСОНБАЕВ өз кабарчы