141 Бардыгы /

        Ош облустук соту Кара-Суу районунун мурдагы акими, Бажы кызматынын төрагасынын мурунку орун басары Райымбек Матраимовдун бир тууган агасы Тилек Матраимовдун апелляциялык арызын карап, аны канааттандырган чечим чыгаргандыгын Ош облустук сотунун басма сөз кызматы  ырастады.

Маалыматка караганда, Ош облустук сотунун ушул жылдын 6-августтагы өкүмүнүн негизинде Кылмыш-Жаза Кодексинин 337-беренеси (“Кызмат абалын кыянаттык менен пайдалануу”) менен айыпталган М.Т.И.ке үч миң эсептик көрсөткүчтүн өлчөмүндө айып салынып, башкача айтканда мамлекеттин пайдасына 300 000 (үч жүз мин) сом өндүрүлдү. Ал эми Кара-Суу райондук соту Матраимовдун ишин быйыл 11-июнда карап, 1 миллион сом айыппул төлөөгө милдеттендирген жана жакынкы үч жылда мамлекеттик жана муниципалдык кызматтарды ээлөө укугунан ажыраткан. Экс-аким менен жактоочусу аркылуу сот чечимине нааразы болуп, облустук сотко кайрылган эле.

Тилек Матраимовго 2019-жылы Кара-Суу районунда жер алдындагы өтмөктүн курулушуна байланыштуу Кылмыш-Жаза Кодексинин «Кызмат абалын кыянаттык менен пайдалануу» беренеси менен айып тагылган. Ал эми Тилек Матраимов быйыл 25-мартта бир туугандары Райымбек, Руслан, Исламбек Матраимовдор менен чогуу Азербайжандын Баку шаарында кармалып, 26-мартта Бишкекке жеткирилген. Андан ары апрель айында үй камагына чыгарылган.

Баса, Райымбек Матраимовго Кылмыш-Жаза Кодексинин «Эркиндигинен мыйзамсыз ажыратуу» жана дагы «Кылмыштуу жол менен алынган кирешелерди мыйзамдаштыруу-адалдоо»  беренелери менен кылмыш иши козголуп, ушул тапта тергөө кызуу жүрүп жатат. 27-мартта Биринчи май райондук сотунда ага Кылмыш-Жаза Кодексинин «Мамлекеттик чек арадан мыйзамсыз өтүү» беренеси менен дагы айып тагылган.  Ал эми 24-июнда сот анын абактагы мөөнөтүн 27-августка чейин узарткан эле.

Баса, 2021-жылы УКМК Райымбек Матраимовду коррупцияга айыптап кылмыш ишин козгоп, ал 2016-жылдын башында бажыдагы башка аткаминерлер менен көмүскө коррупциялык схема түзгөнүн билдирген. Сот аны күнөөлүү деп таап, 260 миң сом айып пул чегерген эле. Райымбек Матраимов өзү күнөөсүн мойнуна алып, мамлекетке 2 миллиард сом төгүп берген. УКМКнын төрагасы Камчыбек Ташиев 2023-жылы 2-ноябрда Райымбек Матраимов менен Камчы Көлбаевди (Камчыбек Асанбек) «Кыргызстанда мафия түзгөн» деп айыптаган. Кыргызстанда «Кримчөйрөнүн анабашы» аталган Камчы Көлбаев былтыр 4-октябрда Бишкекте УКМКнын атайын операциясы маалында өлтүрүлүп, жок кылынган.

Алишер ТОКСОНБАЕВ, өз кабарчы