57 Бардыгы /

Ош облусунун ички иштер башкармалыгынын демилгеси аркасында аталган облустун аймагында «Үй-бүлө» аталышында ыкчам алдын алуу иш-чаралары байма-бай жүргүзүлүүдө. Бул туурасында Ош облустук ички иштер башкармалыгынын басма сөз кызматынан билдиришти.

Маалыматка караганда, Араван райондук ички иштер бөлүмүнүн кызматкерлери жергиликтүү бийлик өкүлдөрү, айыл башчылар, билим берүү мекемелеринин, коомдук алдын алуу борборлорунун, Үй-бүлөнү жана балдарды коргоо бөлүмүнүн мүчөлөрү менен биргеликте чыр-чатактуу үй-бүлө катары ички иштер органдарында каттоодо турган атуулдарга жана мектеп окуучуларына зордук-зомбулук жөнүндө түшүндүрүү жараянын кызуу жүргүзүштү.

Буга улай көчөлөргө орнотулган ледэкрандарга атайын милиция тарабынан даярдалган «Үй-бүлөлүк зордук-зомбулук болсо эмне кылуу керек?» деген видеролик коюлду. Ошондой эле, милициянын көчмө кабылдамасы тарабынан айыл тургундарына жана мектеп окуучуларына зордук-зомбулук тууралуу китепчелер, милициянын ишеним телефондору таркатылып, жол кыймылынын коопсуздугун сактоо боюнча түшүндүрүү иштерин жүргүзүлдү.

Аталган иш-чаранын негизги максаты- үй-бүлөлүк зордук-зомбулукка жол бербөөнү жүзөгө ашыруучу субьекттердин өз ара кызматташуусун бекемдөө, зордук-зомбулук жасаган жарандардын мыйзам алдында каралган жоопкерчилигин коомчулукка жеткирүү жана зомбулуктун алдын алууну ар бир инсан өзүнөн баштап, башкаларга дагы жеткирип, үлгү болууну колго алуу.

Белгилей кетчүү жагдай: Ош облусунун аймагында жыл башынан бери үй-бүлөгө байланышкан 57 кылмыш иши козголуп, тергөө амалдары жүргүзүлгөн. Ошондой эле, Кыргыз Республикасынын Укук бузуулар жөнүндө Кодексинин беренелерине ылайык 74 административдик пртокол толтурулган.

Ош облусунун ички иштер башкармалыгынын демилгеси менен үй-бүлөлүк зордук-зомбулуктун алдын алуу иш-чарасы облустун бардык райондорунда дагы өткөрүлмөкчү.

Алишер ТОКСОНБАЕВ, өз кабарчы