3 Бардыгы /

Баткен облусунун Лейлек районунда «Келечек» жана «Жаш тилек» мектептеринин курулушу эмдигиче бүтпөй, окуучулар көчөдө эле окуп жатышат. Бул туурасында Жогорку Кеңештин депутаты Чыңгыз Ажибаев парламенттин жыйынында билдирди.

Эл өкүлү Чыңгыз Ажибаев мамлекеттик бюджеттен каржыланып, 2024-жылы бүтүрүлъ турган тизмеге кошулган менен аталган мектептердин курулуш иштеринде таптакыр жылыш болбой жаткандыгын баса белгиледи.

– «Келечек», «Жаш-Тилек» мектептеринин курулушу ътъ эле жай жүрүп жатат. Мен Мамлекеттик курулуш агенттигине июнда атайын кат менен кайрылгамын. Сентябрда дагы кайрылып, ал жоопко караганда төрт айда жылыш болбоптур. Балдар дагыле сыртта, мындайча айтканда. эшикте окуп жатышат, – деп тызылдады Жогорку Кеңештин депутаты Чыңгыз Ажибаев.

Баткен облустук усулдук борборунан бул маалыматты кабарчыбызга ырастап, курулуш иштери жүрүп жатканына байланыштуу эки мектепте окутуу башка имараттарда уюштурулгандыгын кошумчалашты. Бирок, окуучулар кандай имараттарда окуп жатышкандыгын ачык айтышкан жок. Мындан тышкары Баткен шаарындагы бир мектеп курулуш жүрүп жаткандыгына  байланыштуу он-лайн түрүндө окуп жатат.

Кыргызстанда жалпы жонунан 2397 мектеп бар. Анда 80 миңден ашык мугалим эмгектенет. Буларда 1 миллион 480 миңден ашуун бала окушат.

Алишер ТОКСОНБАЕВ өз кабарчы