12 Бардыгы /

Ош облусунун Алай районунда деле пенсионерлердин катары улам гана калыңдап баратат. Ал эми Кыргыз Респуликасынын Президенти Садыр Жапаровдун “Келечекке салым” программасына аталган аймактан 70 бала кошулду. Бул өңүттө Алай райондук Социалдык Фонд башкармалыгынын жетекчиси Дастан САРТБАЕВди кенен-чонон кепке тарттык.

-Дастан мырза, жашырып не. Алай жергесинде деле пенсионерлердин катары улам эле калыңдап бараткандай?

-Ананчы! Бүгүнкү күнгө карата Алай районунда 11 916пенсионерибиз бар.

-Ал эми булардын катмары кандай?

-10 168ине жаш курагына жараша пенсия чектелген. Ал эми 1 213ү – майыптар. Мындан тышкары 535и – багуусунан биротоло ажырагандар.

-Санариптештирүү заманында пенсия чектөө түйшүгү деле кыйла жеңилдегендир?

-Ооба! Мурун документтин 18 түрү тегиз толтурулуп, албетте, баары тең суй жыгылышчу. А азыр пенсияга чыгуу биротоло жеңилдетилбедиби. Соцфондго паспортунун көчүрмөсүн, Эмгек китепчесин, дипломун жана аскердик билетин гана тапшырышат. А калганын өзүбүз тариздейбиз.

-Баса, Соцфонд тармагына санариптештирүү киргизилгенден тартып, коррупция дээрлик тыйылбадыбы. Андыктан, пенсияларын адамдар анан кантип алып турушат?

-Президент Садыр Жапаровдун №168 жарлыгына жана Кыргыз Өкмөтүнүн №30 токтомуна ылайык 2577 пенсионер акчасын жергиликтүү почталардан гана алышат. Ал эми 9399уна банктар аркылуу жеке карточкаларына эле которулат. Демек, Сиз шексинген коррупциянын Алай районунда аты түгүл, жыты жок!

-Дастан мырза, Президент Садыр Жапаровдун “Келечекке салым” программасына алайлык балдар деле кошулду бекен?

-Биздин районубузда Президент Садыр Жапаровдун “Келечекке салым”  программасына Алай районунан 70 бала киргизилген. Эми булар 18 жашка толгучаңды, мындайча айтканда, эрезеге жеткиче банктардагы жеке эсептерине 500 миң сом которулат. Албетте, кубаттай турган жышаан.

        Кепке тарткан: Алишер ТОКСОНБАЕВ, өз кабарчы