3 Бардыгы /

Баткенде уюшкан кылмыштуу топко тиешеси бар жаран акыры укук коргоо оаргандары тарабынан кармалды. Бул туурасында Улуттук коопсуздук мамлекеттик комитетинен билдиришти.

Кармалган Кыргыз жараны УКМК тарабынан Кыргыз Республикасынын Кылмыш-Жаза Кодексинин «Кылмыштуу кирешелерди легализациялоо (адалдоо)» беренеси боюнча козголгон кылмышка шектелген 1967-жылы туулган Кыргыз  жараны А.Р.О. экен. Шектүүнүн «Равшан-Тентек» криминалдык аты менен таанымал жана «Женго» каймана аттуу Кадыр Досоновдун уюшкан кылмыштуу тобуна тиешеси бар.  Аталган А.Р.О. 2001-жылы Дара айыл өкмөтүнүн «Жетиген» техникалык сервисинин балансында турган «Көк-Дөбө» дачасын өзүнө чектеш аймагын 1,5 гектар өлчөмүндө мыйзамсыз ээлеген. Андан кийин документтерди Баткен шаардык башкармалыгы аркылуу өзүнө дагы мыйзамдаштырган. Ушундан соң А.Р.О. аталган аймакта чарбалык курулуштары бар турак үй курган. 2004-жылы кылмыштуу кирешелерин жашыруу максатында мүлктү жакын тууганына каттатып таштаган. Ошондой эле ал өзүнүн кылмыш чөйрөсүндөгү абалынан ашкере пайдаланып, Баткен районунун аймагындагы бир нече жер тилкелерин жана кыймылсыз мүлк обөекттерин мыйзамсыз ээлеп алып, жакын туугандарынын атына каттаткан. Маселен, Баткен районунун Бужум айылындагы 15 гектар айыл чарба жер тилкесин мыйзамсыз пайдаланып, эгиндерин сугаруу максатында төмөндө жайгашкан калктуу конуштардын тургундарын ичилүүчү суу менен камсыз кылуучу «Таза-Суу» скважинасына өзүм билемдик менен кошулган. Натыйжада, аталган конуштун тургундарында ичилүүчү суунун жетишсиздиги көйгөйү жаралган.

Мындан тышкары А.Р.О.го карата Кыргыз Республиасынын Кылмыш-Жаза Кодексинин 215-беренеси менен электр энергиясын өз алдынча пайдалануу фактысы боюнча дагы кылмыш иши козголгон. Тактап айтканда, ал 2001-2025-жылдары электр тармактарына эсепке алуучу шайманы жок мыйзамсыз кошулуп, натыйжада мамлекетке 1 миллион 200 миң сомдон ашуун зыян келтирген. Тинтүү маалында андан каттоосу жок ок атуучу куралдар жана ок-дарылар дагы табылган.

Ушул тапта шектүү УКМКнын убактылуу кармоочу жайына киргизилип, анын башка кылмыштарга тиешеси бар экендигин аныктоого багытталган тиешелүү тергөө-ыкчам иш-чаралар жүргүзүлүп жаткан чагы.

Алишер ТОКСОНБАЕВ, өз кабарчы