15 Бардыгы /

Бүгүн, 21-октябрында Бишкек шаарында Кыргыз Республикасынын Юстиция министрлигине караштуу Пробация департаментинин жаңы кеңсесинин жана Юстиция үйүнүн ачылыш аземи болуп өттү.

КРдин Юстиция министрлигинин маалыма кызматы билдиргендей, иш-чарага Кыргыз Республикасынын Министрлер Кабинетинин Төрагасынын орун басары — Юстиция министри Аяз Баетов, Европа Биримдигинин Кыргыз Республикасындагы Өкүлчүлүгүнүн башчысы Реми Дюфло мырза, БУУнун Баңгизаттар жана кылмыштуулук боюнча башкармалыгынын (БУУ БКБ) Борбор Азия, Афганстан, Пакистан жана Иран боюнча регионалдык өкүлү Оливер Штольпе мырза катышты.

Юстиция үйүндө жарандарга нотариалдык кызматтар, юстиция органдарынын ведомстволук архиви, ресурстук борбор жана реалдуу убакыт режиминде байкоо жүргүзүүнү камсыз кылган Юстиция министрлигинин мониторинг борбору жеткиликтүү болот.

Пробация кеңсесинде пробациянын кардарлары менен натыйжалуу иш алып баруу, ошондой эле департаменттинкызматкерлеринин квалификациясын жогорулатуу үчүн зарыл болгон ресурстар жана адистер топтолгон.

Юстиция министри өз сөзүндө Юстиция үйүнүн ачылышы — адам укуктарын коргоого багытталган санариптик технологияларды ишке ашырууну көздөгөн мамлекеттин жүргүзүп жаткан саясатынын жакшы көрүнүшү экенин белгиледи.

Жаңы формат юстиция системасынын негизги кызматтарын — нотариатты, пробацияны, ведомстволук архивди, ошондой эле бөгөт коюу чаралары боюнча электрондук байкоо каражаттарынын жана пробациянын кардарларынын реалдуу убакыт режиминде ишин контролдоону камсыз кылган мониторинг борборун бир мейкиндикте бириктирерин билдирди.

Юстиция үйү мамлекеттик жана ведомстволук бюджеттин эсебинен түзүлдү, ал эми Пробация кеңсеси Европа Биримдигинин жана БУУнун Баңгизаттар жана кылмыштуулук боюнча башкармалыгынын (БУУ БКБ) колдоосу менен JUST4ALL программасынын алкагында ишке ашырылды.

Иш-чаранын жүрүшүндө Европа Биримдиги тарабынан Пробация департаментинин муктаждыктары үчүн берилген унаалардын ачкычтары символикалык түрдө өткөрүлүп берилди, бул өз кезегинде кызматкерлердин мобилдүүлүгүн жана жергиликтүү деңгээлдеги иштин натыйжалуулугун арттырууга өбөлгө түзөт.