1,653 Бардыгы /

БАТКЕНДЕ КААДА–САЛТТАГЫ АШЫКЧА ЫСЫРАПКЕРЧИЛИКТИ КЫСКАРТУУ ЖААТЫНДА ТАЛКУУЛАР КЫЗЫДЫ

БАТКЕН. Кыргыз Өкмөтүнүн Баткен облусундагы ыйгарым укуктуу өкүлүнүн орун басары Чынар Саттарованын жетекчилиги астындаоблустун аймагындагы аялдар Кеңештеринин төрайымдары жана мүчөлөрүнүн катышуусунда атайын жыйын өткөрүлдү.

Бул жыйында Баткен облустук Аксакалдар Кеңешинин төрагасы Туйгун Жолдошев,облустун казысы Пазылажы Султанмуртов, Эмгек сиңирген мугалим Гапыр Мадеминовдор сүйлөшүп, каада-салттагы ашыкча ысырапкерчиликти кыскартууда аялдардын орду абдан чоң экендигин баса белгилешип, ашыкча чыгымдарды кантип кыскартуу боюнча дагы биртоп сын-сунуштарын айтышты.

Кыргыз Өкмөтүнүн Баткен облусундагы ыйгарым укуктуу өкүлүнүн орун басары Чынар Саттарова өз сөзүндө аялдар Кеңештерин облустун аймагында бул демилгени жүзөгө ашырууга такай көмөктөшүүгө чакырып, каада-салтыбызга таптакыр төп келбеген жорук-жосундарды жоюу боюнча түшүндүрүү жараянын мындан дагы күчөтүү зарылдыгын кыйытты.

Ал эми жыйындын катышуучулары Кыргыз Өкмөтүнүн Баткен облусундагы ыйгарым укуктуу өкүлчүлүгүнүн каада-салттагы ашыкча ысырапкерчиликти кыскартуу боюнча демилгесин кош колдоп кубатташаарын, ошондой эле жер-жерлерде түшүндүрүү иштерин жүргүзүүгө түздөн-түзкөмөктөшөөрүн дагы ачык билдиришти. Антишпесе, каран калгыр атаандаштык, курунамыс,  той-аштарды байма-бай өткөрүү менен  элибиз орду толгус чыгымдарга учурап, кедейликтин сазына биротоло батып бараткандыгы дагы баса айтылды.

Айтмакчы, Кыргыз Өкмөтүнүн Баткен облусундагы ыйгарым укуктуу өкүлчүлүгү, Баткен облусунун коомчулугу, жалпыга маалымдоо каражаттары аркылуу жалпы кыргызстандыктарга, каада-салттагы ашыкча чыгымдарды кыскартуу боюнча дагы буга дейре атайын Кайрылуу дагы жолдошкон.

Алишер ТОКСОНБАЕВ, өз кабарчы