1,328 Бардыгы /

БИШКЕК. Кыргыз Республикасынын Президенти Сооронбай Жээнбеков Бишкек шаарынын мэриясы тарабынан сатылып алынган жаңы газмотор автобустарын өзү бир сыйра текшерди. Автобустардын иштөө тартиби жана киргизилип жаткан жаңылыктар жөнүндө борбор шаардын Ала-Тоо аянтында Бишкек шаарынын мэри Азиз Суракматов, Бишкек шаардык жүргүнчүлөр автотранспорттук ишканасынын директору Нурлан Койчубаков, швейцариялык BPC AG компаниясынын долбоордук департаментинин вице-президенти Тохир Абдукадыров баяндама жасашты.

Бишкек шаарынын мэри Азиз Суракматовдун маалыматына караганда, Бишкек шаарынын мэриясы жалпы суммасы 301,9 миллион сомго Yutong Кытай компаниясы тарабынан 2019-жылдын март айында чыгарылган 60 автобусту сатып алды. Бул автобустарга 80ге чейин адам сыят. Евро-5 экологиялык стандартка ээ. Автобустарга электрондук билет системасын орното турган швейцариялык компаниянын өкүлү Тохир Абдукадыров Президентке маалымдагандай, эми жүргүнчүлөр жол акысын кадимки банк карточкасы же башка электрондук алып жүрүчүлөрдүн жардамы аркасында накталай эмес төлөшсө болот. Бишкек шаардык жүргүнчүлөр автотранспорттук ишканасынын директору Нурлан Койчубаковдун айтымында, бул автобустардын орундуктары кышында жылытылат, 7 байкоочу камера, салондогу абаны тазалоочу фильтрлер орнотулган.

Президент Сооронбай Жээнбеков автобустар менен жеринде таанышып, Бишкек шаарынын мэри менен алардын бирине түшүп дагы көрдү. Мамлекет башчысы электрондук билет системасын киргизүүнүн оң жактарын канааттануу менен баса белгилеп, жаңы унаалар узак убакытка чейин борбор калаанын конокторуна жана тургундарына кызмат кылуусун тиледи.

Айтмакчы, Yutong компаниясы 50 жылдан бери автобустарды чыгарат жана КЭР рыногун 32 пайыздан ашуун, ал эми дүйнөлүк рынокту 15 пайыздан ашуун өндүрүш көлөмү көлөмү менен камсыздайт. Бул компаниянын автобустары Улуу Британия, БАЭ, Катар, Орусия, Филиппин, Африка, Кубага жана КМШ өлкөлөрүнө дагы жөнөтүлөт.

Алишер ТОКСОНБАЕВ, өз кабарчыбыз