1,086 Бардыгы /

Орусиячыл жикчилдердин көзөмөлүндөгү Украинанын Донбасс аймагынын жашоочуларына орус паспортторунун берилиши Пенсиялык фонддун чыгымдарын жылына 100-175 миллиард рублге көбөйтүшү мүмкүн. Бул тууралуу The Bell басылмасы жазды.

24-апрелде Орусиянын президенти Владимир Путин Украинанын чыгышындагы эки аймактын жашоочуларына орус паспортторун берүүнү жеңилдетүү тууралуу жарлыккакол койгон.

The Bell басылмасынын журналисттери эгер аталган аймактардын жашоочуларынын көбү орус паспортторуна ээ болуп, андан соң ал өлкөдөн пенсия ала баштаса, бул үчүн Орусиянын бюджетинен канча каражат кетиши мүмкүндүгүн эсептеп чыгышкан.

Reuters агенттигинин маалыматына караганда, Донбасста жалпысынан миллиондон ашык пенсия курагындагы адам жашашы мүмкүн. Эгер алардын бардыгы орус пенсиясын ала баштаса, анда бул үчүн Орусиянын бюджетинен жылына 100 миллиард рублден 175 миллиард рублге чейин каражат кетип турат.

Басылма белгилегендей, бул чыгымдардын бир бөлүгүн Орусия 2014-жылы, Киев жикчилдердин көзөмөлүндөгү аймактын тургундарына пенсия төлөбөй калганда эле өзүнө алган болушу мүмкүн.

Донбасстын жашоочуларына орус паспортторун берүүнү жеңилдетүү тууралуу Москванын чечими Украина, Евробиримдик жана АКШ тарабынан катуу сынга алынды. Бейшембиде Украинанын демилгеси менен жыйынга чогулган БУУнун Коопсуздук кеңешинде бул өлкөлөр Орусиянын чечими Донбасстагы жаңжалды жөнгө салуу тууралуу макулдашууга каршы келерин белгилешти.

Орусия паспорт берүүнү жеңилдетүү тууралуу жарлыкты гуманитардык максаттар менен түшүндүрүүдө. Өлкөнүн Ички иштер министрлигинен орус жарандыгын алууну каалаган донбастыктардан украин жарандыгынан баш тартуу талап кылынбай турганын билдиришкен.

www.