805 Бардыгы /

            БИШКЕК. Президент Сооронбай Жээнбеков «Аймактар үчүн Таза суу» Форумунда таза суу боюнча долбоорлорду жүзөгө ашыруудагы туруктуу колдоосу үчүн өнүгүү боюнча өнөктөштөргө терең ыраазычылыгын ачыктады.

            Ушул тапта «Таза суу» долбоорунун алкагында Европа реконструкциялоо жана өнүктүрүү Банкынын, Евро Биримдиктин жана Швейцария Конфедерациясынын колдоосу аркасында республикадагы жыйырма шаарыбызда 11,2 миллиард сом өлчөмүндөгү ири долбоорлор ишке ашырылып жатат. Мындан тышкары, ЕБРР, ЕвроБиримдик жана Швейцария Өкмөтү тарабынан шаарлардан тышкары айыл жерине дагы инвестиция тартуу жаңыдан башталганы турат. Президент Сооронбай Жээнбеков ошондой эле айыл жерин ичилүүчү таза суу менен камсыз кылуу маселесиндеги жардамы үчүн Дүйнөлүк Банкка, Азия өнүктүрүү Банкына, Европа инвестициялык Банкына, Ислам өнүктүрүү Банкына, Сауд өнүктүрүү Фондуна, Катар кайрымдуулук Фондуна, Ас-Сафа жана Ас-Салам Фонддоруна терең ыраазычылыгын дагы билдирди.

            Мамлекет башчысы баса белгилегендей, акыркы эки жылда бул маселени чечүү үчүн бир топ чечкиндүү иш-аракеттер жасалды. Кыргыз Республикасын өнүктүрүүнүн Улуттук стратегиясы кабыл алынып, анда калкыбызды таза суу менен камсыздоо приоритеттүү багыт катары аныкталды. Ага ылайык Кыргыз Өкмөтүнө 2023-жылдын аягына чейин калктуу конуштарды 100 пайыз таза суу менен камсыздоо милдети коюлду.

                        Алишер ТОКСОНБАЕВ, өз кабарчы