1,865 Бардыгы /

Академик М.Адышев атындагы Ош технологиялык университети (ОшТУ) технологиялык өңүттөгү гана кесипкөй адистерди белендеген өлкөбүздүн түштүгүндөгү жападан жалгыз жогорку окуу жайы. Ошондуктан, бул ЖОЖго тапшыргандардын саны улам калыңдап баратат. Мунун себебин ОшТУнун кабыл алуу комиссиясынын жооптуу катчысы Заирбек АБДЫРАХМАНОВдон сураштырдык.

– Заирбек мырза, түштүк жергесиндеги башка ЖОЖдорго караганда быйыл ОшТУга тапшыргандардын катары улам арбып баратыптыр. Мунун негизги сыры эмнеде?

– Танып кайда барабыз? ОшТУ элүү жылдык тарыхында илимий пайдубалы өтө бекем курулуш, архитектура, дизайн, энергетика, автоунаа, менеджмент, экология, кибернетика жана маалыматтык технологиялар жаатына өтө бекем ыктады. Анткени, кичинекей Кыргызстандын өнүгүшү өндүрүш менен абдан тыгыз байланышкан. Ошол себептүү ОшТУ өлкөбүздүн оожалышы үчүн салмактуу салым кошкон адистерди гана белендейт. Себеби, 2011-жылы ОшТУ Европа университеттеринин Улуу Хартиясына кабыл алынган. Мындан тышкары ТАСИС, ТЕМПУС, ДААД, GIZ, Европадагы агартуу программаларынын Кыргызстандагы жападан жалгыз өнөктөшү. ШКУнун университеттер тармагынын дагы мүчөсү.

– Ушул тапта көбүн эсе кайсыл кесипке ээ болууну эңсегендер көп болууда? Мунун себебин сиз эмнеден көрөсүз?

– Заман талабына жараша технология жаатына ыктагандар абдан арбыды. Анткени, ОшТУнун студенттери өлкөбүздөгү эң алдыңкы мекеме-ишканаларга практикага чыгышып, болочокто ушул тармактарда эмгектенүүгө дагы өбөлгө түзүлүп олтурат.

– Дегеле сиздин баамыңызда ОшТУга быйыл элеттиктер көп тапшырып жатышабы, же шаардыктарбы?

– Бизге айылдан агылгандар абдан арбыды. Анткени, элет жергесинде деле автоунаа айдагандар көбөйдү. А энергетика улам күчүнө кирип баратат. Табийгат улам кооз тартып, көз жоосун гана алууда. Жаратылыш байлыктарын сарамжалдуу пайджалануу үчүн технологияны өздөштүрүү сөзсүз кажет!

Мындан тышкары кибернетика күчүндө. Аны өнүккөн экономикасыз жүзөгө ашыруу дегеле мүмкүн эмес. Ушуну менен гана чектелбестен, ОшТУ кадрларды кайра даярдоого дагы бекем ыктады. Бул өңүттө жарнамаларыбызды

“Жаштык” телестудиясы, “СтудTimes” гезити, жаштар комитети, сервис борбору бекер эле жарыялап турушат.

– Эмне, колледждер жабылып кеттиби?

– Жо-жок! ОшТУнун алдындагы технологиялык коллежи, Өзгөн шаарындагы коллежибиз, ошондой эле бир катар кесиптерге багыттаган даярдоо борборлору дагы үзгүлтүскүз эле иштеп келатат. Ошентип, ОшТУнун инженердик-технологиялык мүмкүнчүлүктөрү улап кеңейип баратат.

– Заирбек мырза, ОшТУну бүтүргөндөрдү жумуш менен камсыздоо жагы кантти?

– Бул жагдай биздин такай көңүлүбүздүн борборунда. Кудайга шүгүр, ОшТУну бүтүргөндөр иш таппай калган учурлоар каттала элек. Анткени, заманбап гана кадарларды даярдап келатабыз.

Алишер ТОКСОНБАЕВ, өз кабарчы