691 Бардыгы /

Тажикстандын Башкы прокуратурасы Хоженттен Душанбеге которулуп жаткан маалда өлгөн 14 соттолуучу кыйноолорго жана катаал мамилеге туш  болгон деген маалыматтарды четке какты.

Буга чейин маркумдардын туугандары сөөктөрдү жууп жатып, алардын денелеринен көгала-тактарды байкашканын билдиришкен.

Тажикстандын башкы прокурору Юсуф Рахмон кыйноо фактысын караманча четке какты. Ал соттолуучулар бузулуп кеткен нандан улам өлгөнүн, бул окуяны прокуратуранын атайын тергөө тобу иликтеп жатканын ырастады.

Анын айтымында, Хоженттен Душанбеге которулуп жаткан маалда ажал тапкан соттолуучулар буга чейинки тополоңдорго катышкан эмес.

Бузулган нанды жеп, бирок аман калган эки кишини абалы туруктуу, жакын арада экспертизанын жыйынтыгы чыгат.

7-июлда 128 адам түндүктөн түштүктөгү абактарга которулуп жаткан. Алар өлкөнүн борбордук бөлүгүндөгү жана Хатлон облусундагы абактарга жайгаштырылмак. Жаза аткаруу башкармалыгынын маалыматы боюнча, окуя соттолуучулар бараткан машине Майхура деген жерге келген учурда болгон. Бул Душанбе шаарынан 45 чакырым аралыктагы кыштак. Башкармалыктын ырасташынча, соттолуучулардын бири фургондо бараткан башка адамдар менен үч бөлкө нанды бөлүшүп жеген. Уулануунун белгилери тез эле пайда болгон.

Нан жегенден кийин эле жарым сааттан кийин машинеде бараткан 16 адам кусуп, көңүлү айнып, өзүн жаман сезе баштаган. Саат 18:20да машине тергөө абагына жеткенде уулангандардын абалы кескин начарлап кеткен. 16 адам эстен танып жыгылган. Саат 18:25те ууланган адамдар «Тез жардам» менен тергөө абагына жеткирилген. Болгон мүмкүнчүлүктү колдонуп, дарыгерлер эки адамдын өмүрүн сактап калышкан.

Бирок маркумдардын жакындары бул версияга ишенбей жатышат.

Мындан эки ай мурда Тажикстандын Вахдат шаарындагы колонияда тополоң чыгып, 32 адам каза болгон. Анын 29у абакта кармалгандар, үчөө түрмө кызматкерлери. Расмий маалыматтарда тополоң чыгаргандар абактагы медициналык бөлүмдү өрттөгөн жана бир канча соттолуучуну барымтага алып, өздөрүн абактан бошотууну талап кылышкан.

www.