1,679 Бардыгы /

БИШКЕК. Кыргыз Республикасынын Президенти Сооронбай Жээнбеков Маалыматтык технологиялар жана байланыш мамлекеттик комитетинин (МТБМК) төрагасы — Мамлекет башчысынын кеңешчиси Дастан Догоевди жана МТБМКга караштуу «Электрондук өз ара аракеттенүү  борбору» мамлекеттик ишканасынын директору Нурия Кутнаеваны кабыл алды.

Адегенде Президентке өлкөнү санариптик трансформациялоо боюнча милдеттердин аткарылышы туурасында маалымат беришти. Ошондой эле «Санарип Кыргызстан» санариптик трансформациялоо Концепциясын ишке ашыруу, буга улай Кыргыз Республикасынын Коопсуздук Кеңешинин 2018-жылдын 14-декабрындагы чечимдерин аткаруу жагы ачык-айкын талкууланды. Президент Сооронбай Жээнбеков санариптик трансформациялоонун натыйжаларын өлкө жарандары күндөлүк турмушунда сезиши керектигин эскертти. Ал баса белгилегендей, мамлекеттик кызмат көрсөтүүдө адам факторун четтетүү маанилүү милдет болуп саналат. Санарип технологияларын өнүктүрүүнүн натыйжасында өлкөбүздө калк жана бизнес үчүн мүмкүн болушунча өтө ыңгайлуу шарттар гана түзүлөт.

МТБМК төрагасы Дастан Догоев артыкчылыктуу долбоорлор жана жарандарга мамлекеттик кызмат көрсөтүү чөйрөсүнө санариптик технологияларды киргизүүнүн азыркы абалы жөнүндө кеңири маалымат берди. Ал жакынкы мезгилде 189 мамлекеттик кызматтар электрондук форматка өткөрүлүп, 500 миңден ашуун өлкө жарандары камтылаарын жана калкты тейлөө борборлорундагы кезек күтүүлөр дээрдик 30 пайызга кыскартылаарын дагы кошумчалады. Дастан Догоев ошондой эле Өкмөттүн чечимине ылайык санариптештирүү боюнча республикалык штаб түзүлүп, бул өңүттө пайда болгон маселелерди ыкчам чечүгө жакшы мүмкүнчүлүк жаралгандагын эске салды.

Ал эми МТБМКга караштуу «Электрондук өз ара аракеттенүү борбору» мамлекеттик ишканасынын директору Нурия Кутнаева бүгүнкү күнгө карата 60 мамлекеттик органдар жана ведомстволук бөлүмдөр «Түндүк» ведомстволор аралык электрондук өз ара аракеттенүү системасына кошулгандыгын маалымдады. 2018-жылдын июль айында бул системага 18 мамлекеттик органдар кошулган эле. Мындан тышкары ушул тапта 24 мамлекеттик органдарда маалыматтардын 71 базасы ишке кирди. Жылдын аягына чейин ишке киргизилген маалымат базалардын саны дагы 80ге жетет. Бул министрликтер менен ведомстволордун ортосундагы 2 миллионго чукул суроо-талаптарды электрондук форматка өткөрүүгө мүмкүндүк берет. Натыйжада убакыт жана кагаз сатып алууга кеткен каражат сезилээрлик үнөмдөлөт.

            Соңунда Президент Сооронбай Жээнбеков жылдын аягына дейре электрондук форматтагы мамлекеттик кызматтардын санын көбөйтүүнү, «Санарип Аймак» Программасын ишке киргизүүнү жана мамлекеттик органдар ортосунда санариптештирүү маселелери боюнча туруктуу байланышты жөнгө салуу ишин күчөтүү милдетин эскертти.

Алишер Токсонбаев, өз кабарчы