811 Бардыгы /

Ош медициналык колледжинен бул мезгилде адам аягы таптакыр үзүлчү эмес. Ушул тапта бул окуу жайына каттагандар дээрлик сейрек. Мунун себебин аталган окуу жайдын быйылкы кабыл алуу комиссиясынын жооптуу катчысы Гүлшайыр ӨМүРЗАКОВАдан сураштырдык.

– Гүлшайыр айым, мурунку жылдарга караганда Ош медициналык коллежинин эшигин сагалагандар дээрлик жокко эсе го?

– Кантип? Ош шаарынын өзүндө эле төрт Медициналык коллеж бар. Көч дагыле токтогон жок. Талапкерлер тынбай келип жатышат. Бизге көбү документтерин буга дейре эле тапшырып коюшкан. Ошондуктан, эшигибизди жылдагыдай сагалагандар, чынында, жок.

– Заман талабына жараша жаңы адистиктер ачылгандыр? Эмне себептен?

– Соңку тапта калк арасында тиш оорулары өтө арбыбадыбы. Ошондуктан, бюджеттик негизде 25 талапкерди стоматологиялык алдын алуу бөлүмүнө кабыл алып жатабыз. Мындан тышкары жаңыдан ачылган Медициналык алдын алуу-СЭС адистигине дагы тапшыргандар улам көбөйүп баратат.

– Кабыл алуу жараянында адаттагыдай тааныш-билишчилик жана жемкорлук дегеле тыйылчудай эмес?

– Сиз атаган эки мыйзамсыз көрүнүш тең Ош медициналык коллежинде таптакыр жок десем жаңылышпаймын! Анткени, сынактарды бүт Улуттук Тестирлөө Борбору өзү гана жүргүзөт. Ал жакка биздин коллеждин бир дагы өкүлү эч жолотулбайт. Бул тестирлөөнүн жыйынтыгын көз карандысыз комиссия гана жар салат.

– Гүлшайыр айым, биз билгенден Кыргызстандын көпчүлүк ооурканалары дагыле орто медициналык кызматкерлерга абдан эле муктаж! Бирок, ушул өңүттө өлкөбүздүн түштүгүндөгү бүт ЖОЖдордогу Медициналык коллеждердин баарын кошуп, өз ара бириктирип, анан Ош шаарында Сиздердин окуу жайдын базасында Медициналык Институт ачуу демилгесине кандайча карайсыз?

– Жакында эле Ош медициналык коллежи көз карандысыз аккредитациядан ийгиликтүү өттү. Демек, базабыз жетиштүү жана заманбап жабдылган. А окутуучуларыбыз дагы бүт чоң тажрыйбага ээ.

Демек, биздин базабызда Ош шаарында Медициналык Институт түптөлсө, мындан ириде мамлекетибиз гана утаар эле. Биринчиден, чаржайыт кадрларды даярдоо дээрлик тыйылмак. Экинчиден, даярдалган адистердин сапаты ого бетер жакшырмак. үчүнчүдөн, анан бүтүрүүчүлөрдү тоскоолдуксуз жумушка жайгаштырууда дагы көйгөй жаралмак эмес. Анткени, Ош медициналык коллежи башынан эле Ош шаардык жана облустар аралык ооруканалары, Түштүк жергесинин ар бир ар бир айылындагы ФАПтар менен абдан тыгыз иштешет. Ошондуктан, биздин бүтүрүүчүлөрүбүз ишке жайгашууда таптакыр кыйналышпайт.

Алишер ТОКСОНБАЕВ, өз кабарчыбы.