1,618 Бардыгы /

    БАТКЕН. Баткен облусу “Аймактарды өнүктүрүү жана өлкөнү санариптештирүү” жылынын алты айынын  жыйынтыгын чыгарды. Жарым жылды жыйынтыктаган облустук коллегияда бардык тармактар боюнча жетишилген ийгиликтер ошол эле учурда кемчиликтер дагы баса белгиленип, алдыда аткарылуучу иш-пландар кең-кесири талкууланды.

      Баткен облусунда 2019-жылдын январь-июнь айында өнөр жай ишканалары тарабынан 1359,1 миллион сомдук продукция өндүрүлүп,  физикалык көлөмдүн индекси 122,5 пайызды түздү. Айыл чарба  продукциясынын дүң чыгарылышы 4266,4 милион сомду түзүп, өткөн жылдын ушул мезгилине салыштырганда 100,5 пайызды түздү. 2019-жылдын алты айынын ичинде 2335 жумушчу орун түзүлдү, же же былтыркы жылга салыштырганда 75.5 пайызды түздү. Мунун ичинен 378 жумушчу орун, жаңыдан ачылган киреше алып келүүчү 48 ишкананын эсебинен түзүлдү. Былтыркы жылдын ушул мезгилине салыштырганда облуста 5 ишкана көп ачылды. Алты айдын жыйынтыгы менен  Баткен облусунда 537.9 миллион сом салык төлөмдөрү жыйналып, жыйымдарды жыйноо 101.9 пайызга аткарылды, же болбосо планга салыштырмалуу 10.4 милион сомго көп чогултулду. Баткен облусунун аймактарындагы 202 айылдын ичинен 122 айылга интернет байланышы жеткирилди. Ал эми  141 мектептин ичинен 116 мектеп интернет тармагына кошулду. Коллегиянын жүрүшүндө ыйгарым укуктуу өкүл жарым жылдын жыйынтыгы менен район шаарлардын көрсөтчктөрүн эске алып, аким жана мэрлерге бир катар тапшырмаларды дагы койду.

      Булар: Кадамжай районунда медициналык кызмат көрсөтүүнү жакшыртуу, билим сапатына көңүл буруу. Баткен районунда жакырчылыкты кыскартуу,айыл аймактардын жергиликтү бюджетин максаттуу жана натыйжалуу пайдалануу. Лейлек районунда энелердин жана  балдардын өлүмү боюнча  маалыматтарды тактоо. Кызыл-Кыя шаарынын тазалыгын сактоо, салык топтоо боюнча белгиленген планды аткаруу.  Баткен шаарында эс алуучу сейил бактарды оңдоо боюнча каражат бөлүү, шаардын тазалыгын толук кандуу камсыз кылуу.

      Коллегия соңунда алдыда айыл чарба продукциясынын түшүмдүлүгүн арттыруу,токой чарба тармагынын жетекчилерин ратациялоону кароо, тиешелүү үй-бүлөлүк медициналык дарыгерлер борборлорунун ишиндеги кемчиликтерди четтетүү жаатында чукул чараларды көрүү, Баткен облусунда миграция кызматынын Өкүлчүлүгүн ачуу, Лейлек районунун Кулунду айыл аймагындагы санариптештирүү аракеттерин башка аймактарга дагы кеңири жайылтуу жаатында иш аракеттерди көрүү керектиги дагы баса белгиленди.

Алишер ТОКСОНБАЕВ, өз кабарчы