2,031 Бардыгы /

     ОШ. Президент Сооронбай Жээнбеков Ош шаарында жаңыдан гана ачылган  калкты тейлөө борборунун ачылышына катышты.

     Мамлекеттик каттоо кызматынын төрагасы Алмаз Мамбетов Кыргызстандын түштүк башкалаасындагы бул борбор жаңы заманбап форматта иштей тургандыгын кошумчалады. Анткени, бул жерде кадимки паспорттор дагы жасалат. Ошондой эле Жарандык каттоо бөлүмүнүн айрым вазийпалары дагы кошо аткарылат.  Борбор бүтүндөй автоматташтырылган, ошондуктан,  күн сайын миңге чукул адамды тейлегенге дагы беймарал үлгүрөт.

     – Кудум ушундай эле борбор Баткен облусунда ачылган эле. Эми ушундай эле калкты тейлөө борборлору өлкөбүздүн башка аймактарында дагы жакын арада ишке киришет, – деп кошумчалады Мамлекеттик каттоо кызматынын төрагасы Алмаз Мамбетов.

       Ал эми Президент Сооронбай Жээнбеков калкты тейлөө сапаты мындан ары ого бетер жакшыраарын убадалады: – Эң башкысы элдин түйшүгү азайтылат. Мындан тышкары мамлекеттик кызматтарды пайдаланууда жемкорлук дээрлик тыйылат. Ошентип, өлкөбүздөгү санариптештирүү жараяны токтобойт, мындан ары ыраттуу түрдө улантылат.

Алишер ТОКСОНБАЕВ, өз кабарчы