1,585 Бардыгы /

ОШ. Президент Сооронбай Жээнбеков өлкө боюнча сапарын дагыле улантууда. Бул ирет Ош облусунун Алай районуна караштуу эң алыскы Сары-Таш жана Күң-Элек айылдарын чекесинен кыдырып, жергиликтүү калктын муң-зарын жеринде гана тыңдады.

     Алай районундагы Сары-Таш жана Күн-Элек айылдары деңиз деңгээлинен  3250 метр бийиктикте  жайланышкан. Жергиликтүү тургундар жолугушууда агартуу тармагынын олуттуу көйгөйлөрүн ачыкташты. Маселен, Сары-Таш айылындагы № 39-мектеп авариялык акыбалга кептелген. А Күн-Элек кыштагындагы мектептин жаны имаратынын курулушу дагы көп жылдан бери таптакыр бүтпөй келе жатат. Мындан тышкары аталган аймактарда медициналык кызмат көрсөтүү деле жайында эмес. Дарыгерлер дээрлик жетишсиз. Мунун айынан кыштак тургундарын социалдык жактан коргоо дагы кендирди кесип турган маалы.

     Жолугушуу маалында Президент Сооронбай Жээнбеков 2020-жылдын жазында Сары-Таш кыштагында жаңы мектеп курулаарын, ошентип, элеттик окуучулар коопсуз жана ыңгайлуу шарттарда билим алышаарын катуу убадалады. Ал эми Күн-Элек айылындагы агартуу мекемесинин курулушу быйыл толук бойдон бүткөрүлөт.

     Кыргыз Өкмөтүнүн алдындагы архитектура, курулуш жана турак жай-коммуналдык чарба агенттигинин директору Бактыбек Абдиевдин айтымында, Сары-Таш айылындагы № 9-мектеп өткөн кылымдын 1986-жылында курулган. Анда 250 окуучу билим алат. Ал эми Күн-Элек кыштагындагы мектептин дээрлик көпчүлүк бөлүгү бүткөрүлдү. Ички жана тышкы ремонттору жана жасалгалоо жумуштары гана калды. Буюрса, быйыл октябрда толук кандуу пайдаланууга тапшырылат.

    Президент Сооронбай Жээнбеков Алай районуна караштуу эн алыскы Сары-Таш жана Күн-Элек айылдарынын жергиликтүү тургундары менен жолугушуусунда  алардын муң-зарын жеринде тыңдап, бир катар суроолоруна ынанымдуу жоопторду гана кайтарды. Ошондой эле айрым көйгөйлөрдү жеринде чечкенге дагы батынды.

Алишер ТОКСОНБАЕВ, өз кабарчы