777 Бардыгы /

    БАТКЕН. Кыргыз Өкмөтүнүн Баткен облусундагы ыйгарым укуктуу өкүлү Акрам Мадумаров баштаган аткминерлер Өзбекстандын Фергана облусунун акими Шухрат Ганиев жетектеген делегация менен Кадамжай шаарында жолугушту. Бул кездешүүгө Баткен жана Фергана облустарынын чек аралаш аймактагы район жана шаарларынын башчылары, ошондой эле күч түзүмдөрүнүн жетекчилери дагы катышышты.

    -Баткен жана Фергана облустары жакын кошуна гана эмес стратегиялык өнөктөш катары дагы эки тараптуу алаканы ыраса кеңейтүүгө үлгүрүп жатабыз. Мындан тышкары ата-бабаларыбыз мураска калтырган достугубуз, бир туугандык ысык мамилелерибиз күн өткөн сайын чыңдалып баратат. Буга далил: үстүбүздөгү жылдын 11-13-июнь күндөрү Өзбекстандын Маргилан шаарында Эл аралык музыкалык-фольклордук “Улуу Жибек жолу” фестивалын өткөрдүк. Бул аркылуу маданий-гуманитардык карым-катышты ого бетер чыңдадык. Ошондой эле руханий баалуулуктарыбыздын окшоштугун дагы бир ирет тастыктадык, – деди Кыргыз Өкмөтүнүн Баткен облусундагы ыйгарым укуктуу өкүлү Акрам Мадумаров.

  Ал эми Өзбекстандын Фергана облусунун акими Шухрат Ганиев “Улуу Жибек жолу” фестивалында Кыргызстандан барган фольклордук топ Кыргыз элинин кайталангыс салттуу музыкасын даңазалап, биринчиликти алгандыгы менен куттуктады: – Бул чекеси гана. Мындай салтыбызды мындан ары дагы ырааттуу түрдө улантабыз. Ошондой эле Корея менен биргеликте Фергана облусунда ачылып жаткан жогорку окуу жайында Баткен облусунан беш студентти акысыз окутуп беребиз. Аларга заманбап шарттар дагы жаратылат.  

   Жолугушуу соңунда тараптар Баткен жана Фергана облустарынын кызматташуусун мындан ары жандандыруу, чекаралаш аймакта коомдук коопсуздукту камсыз кылуу, өзгөчө социалдык-экономикалык жана маданий байланыштарды чыңдоо максатында дагы кенен-чонон сүйлөшүштү.

Алишер ТОКСОНБАЕВ, өз кабарчы