523 Бардыгы /

Кошмо Штаттар жана Европа Биримдиги Москвада шаардык думага шайлоого катыша албай калган талапкерлерди колдогон акция катышуучуларын күч менен таркатууну сындап, кармалгандарды бошотууну талап кылды.

АКШнын Орусиядагы элчилигинин билдирүүсүндө “Орусияда Конституция кепилдик бергендей, жарандардын эркин жана таза шайлоо аркылуу өз пикирин билдирүү укугу чектелүүдө. Бийликтин 3-августтагы аракети жарандардын демократиялык жараяндарга ар тараптуу катышуу укугун бузууда” деп айтылат.

ЕБнын тышкы саясат мекемесинин өкүлү Майя Коцьянчич Европа Биримдиги Орусиядан акция учурунда кармалган 600 кишини токтоосуз түрдө бошотууну талап кыларын айтты. Швеция ТИМинин башчысы Маргот Вальстрём Кремлди көз карандысыз талапкерлерди шайлоого катыштырууга чакырды.

Акция маалында 600 киши кармалганын күн мурун Орусия ИИМи кабарлаган. “ОВД-Инфо” сайтынын маалыматына караганда, 1001 адам кармалган. Алардын көбү бошотулду. 4-август күнү эртең менен ички иштер бөлүмдөрүндө 19 киши калган.

Көбүнчө кармоо Пушкинский менен Трубной аянттарында болду, айрымдары сабалды. Маалыматтарга караганда, беш киши ар түрдүү жаракат менен ооруканага жеткирилди.

27-июлда Москвада шаардык думага шайлоого катыша албай калган талапкерлерди колдогон акция өткөн. Полиция ага 3,5 миңдей адам катышканын кабарлаган. Анда 1300дөн ашуун киши кармалган. “Жапырт башалмандык” беренеси боюнча кылмыш иши козголуп, бул боюнча алты киши камалган, дагы үч кишиге айып тагылган.

www.