1,951 Бардыгы /

ЖАЛАЛ-АБАД. Аксы районунун Кара-Суу айыл аймагында Кара-Камыш көлүнө чейин жол салынып, айыл аймактын 3 чакырым жолу асфальтталып, жаңы спорт сарайы салынып, айылдар дээрлик таза суу менен камсыз болгон.

Учурда дагы бир орто мектептин имаратынын курулушу да жүрүп жатат.  Жылдан жылга элдин турмуш шарты жакшырып, айыл эли өнүгүү жолуна  түшүп жатат.  Айылды өнүктүрүүдө айыл жаштарынын аракеттери мактоого татыктуу. Илгери кара-суулактар аш-тойлорду өткөрүп, кадимки Токтогул менен Жеңижок  жар салып жарчы болуп келген Көк-Ой жайлоосу, эми элге кызмат кылууда. Бир гана түйшүк Көк-Ойго транспорт бара алчу эмес. Эми 100 гектардан ашык бул жайык жерди өздөштүрүүгө да шарт жаралды. Айылдын эли бул жерден даярдаган тоютун улоо менен ташып азап жеп келген.

Айылдын демилгечи жаштары Бейшен, Турсунбай Жоошбаевдер, Мукуш Жумабаев, Топчуалы Урманалиевдердин демилгеси менен бул жерге жол салуу аракети көрүлө баштаган. Бул демилгени мына ушул айылдан чыккан ишкер, мыкты жигиттердин бири «Семиз-Бел» жоопкерчилиги чектелген коомунун жетекчиси Токторалы Жээнтаев колдоого алып, өз техникаларын бөлүп берип жардам көрсөтүп, Көк-Ойго жол салынып, эл даярдаган тоютун техниканын жардамы менен ташып алууга шарт жаралды.

“Бул эле эмес бал челектерди ташып жеткирүүгө, терген жаңактарды, мөмө-жемиштерди алып түшүүгө абдан жакшы шарт жаралды”- дейт мындагылар. Жолдун ачылышы болуп, карапайым эл жаштарга, өзгөчө жол солууга кол кабыш кылгандарга ак баталарын беришти.

Жолдун салынышына Кара-Суу айыл өкмөтү  200 миң сом каражат карап берген болсо, калган каражатты ишкер жигиттер жана эл мүмкүнчүлүгүнө жараша берип, Көк-Ой көркүнө чыгып олтурат.

Абдымомун КАЛБАЕВ, Аксы району