1,033 Бардыгы /

АКШнын мамлекеттик катчысынын жардамчысынын биринчи орун басары, Түштүк жана Борбор Азия боюнча элчи Элис Уэллс 7-августта Нью-Дели менен Исламабаддын Кашмир талашына байланыштуу комментарий берди.

Анда ал: «Биз Кашмир жана башка кооптонууну жараткан маселелер боюнча Индия менен Пакистандын түз сүйлөшүүсүн колдоону улантабыз», деп айтты.

Элис Уэллс ушул тушта беш күндүк иш сапар менен Пакистанда жүрөт. Анын Исламабаддан кийинки сапары Индия менен Шри-Ланкада уланат. Мамлекеттик катчынын өкүлү бул чөлкөмдө Ооганстандагы тынчтык келишимин түзүү боюнча сүйлөшүүлөрдү өткөрүп жүрөт.

Мунун алдында Пакистандын премьер-министри Имран Хан Индиянын Кашмир боюнча чечимин өзгөртүш үчүн болгон «форумдун» баарын колдонууга убада берген. Парламентте 6-августта сүйлөп жатып, ал бул маселени БУУнун Коопсуздук кеңешинде жана Эл аралык кылмыш сотунда көтөрөрүн айтты.

Имран Хан Индиянын аракети эл аралык мыйзамдарга каршы келерин билдирди жана өзөктүк куралы бар бул эки өлкөнүн ортосунда жаңжал чыгып кетсе кетсе «бирөө да жеңүүчү болуп чыкпай турганын» эскертти.

Ушул аптанын башында Индиянын өкмөтү Баш мыйзамды өзгөртүп, Кашмирдин Нью-Делиге баш ийген бөлүгүнүн атайын макамын жокко чыгарарын билдирген. Ага ылайык, негизинен мусулмандар байырлаган Жамму жана Кашмир штаты мурдагыдай өз алдынча иш алып бара албай калат.

Индиянын Конституциясынын 370-беренесинде Кашмирдин Нью-Делиге баш ийген бул бөлүгү өзүнүн Баш мыйзамы менен иш алып барып, өзүнүн желегине ээ болуп, тышкы саясат, коргонуу жана коммуникация тармактарынан башка бардык маселелерде өз алдынча чечим кабыл алып келген.

www.