889 Бардыгы /

Федерация кеңешинин эл аралык иштер комитетинин төрага орун басары, орус суверенитетин коргоо комиссиясынын мүчөсү Андрей Климов Москвадагы оппозициянын каршылык акцияларына тышкы күчтөр таасир этип жатканын айтып, Батышты Орусиянын ички ишине кийлигишүүгө айыптады.

Анын айтымында, бул иште “биринчи скириканы АКШ ойноодо”. Климов 10-августта өткөн оппозициянын митингине башка өлкөгө ак кызмат өтөөгө ант берген кош жарандуу кишилер катышканын белгиледи.

Климов мисал катары жашоосунун көпчүлүк бөлүгүн Улуу Британияда өткөргөн, эми Москва шаардык думасына талапкер болууну чечкен 34 жаштагы Oxxxymiron аттуу рэперди мисал келтирди. Аткаминер андан тышкары “10-августта демонстранттарга юридикалык жардам берген кайсы бир АКШ жаранын” дагы эске салды.

​ Бул арада Федерация кеңешинин көптөгөн мүчөлөрү өзүлөрү да чет мамлекеттерде кыймылсыз мүлккө ээ. Парламенттин жогорку палатасынын Тамбовский облусу боюнча өкүлү Александр Бабаковдун Францияда 16 миллион долларга бааланган жери, Парижде батири бар. Суверендүү интернет жана бийликке акарат келтирүү үчүн жаза колдонуу жөнүндөгү мыйзамдардын авторлорунун бири Дмитрий Савельев Улуу Британиядан 500 чарчы метр аянты менен үй сатып алган. Федерация кеңешинин мүчөсү Любовь Глебованын Греманияда үйү, Виталий Богдановдун Италияда турак-жайы бар.

“Кремлёвский безбашенник” телеканалынын маалыматына караганда, Федерация кеңешинин жети мүчөсү кош жарандуу же башка өлкөдө жашап туруу укугуна ээ.

Москвада шаардык думага көз карандысыз талапкерлерди катыштырууну талап кылган митингдер бир айдан бери уланууда. Жалпысынан бул убакыт аралыгында полиция үч миңдей кишини кармады. 27-июлда Тергөө комитети жапырт башаламандык боюнча иш козгоп, анын алкагында 14 киши камалган.

www.