634 Бардыгы /

Казакстанда тынч жыйындарды, митингдерди, жүрүштөр менен акцияларды жөнгө сала турган мыйзам жарандардын радикалдашуусуна алып келет.

Мындай пикирин 15-августта Адам укуктары жөнүндөгү эл аралык бюронун директору Евгений Жовтис билдирди.

Укук коргоочунун айтымында, муну жарым жылдагы мониторинг тастыктай алат. Митингдерге тыюу салуу жарандардын орчундуу маселелерде өздөрүнүн оюн бийлик өкүлдөрүнө жеткизүү укугунан ажыратат.

— Биздин уюмга соңку үч-төрт айда уруксат берилбеген митингдерге чыкканы үчүн жазага тартылган жүздөгөн киши кайрылды. Алардын көбү уюштуруучу болгон эмес. Басымдуу бөлүгү акцияларга катышпаган, көчөдө өтүп бараткан карапайым адамдар болгон. Бирок полиция кызматкерлери аларды да кармап кетишкен, – деди Евгений Жовтис.

Укук коргоочу тынч жыйындарга тыюу салган мыйзам эл аралык талаптарга каршы келерин белгиледи:

— Эл аралык талаптарга ылайык, тынч жыйындарды өткөрүүгө болбой турган атайын жерлер бар. Ал өлкөнүн коопсуздугун камсыздоо жайлары, ар түрдүү себептер менен адам ден соолугуна кооптуу орундар, аскер бөлүктөрү жана башкалар. Калган жерлердин баарында митинг өткөрүүгө уруксат берилүүгө тийиш.

2019-жылы 9-13-июнь күндөрү Казакстан полициясы митингге чыккан төрт миңден ашуун кишини кармаган. Каршылык акциялары президенттик шайлоо өтүп жаткан учурга туш келген. Митингдин катышуучулары мөөнөтүнөн мурда шайлоо өткөрүү мыйзамсыз экенин айтып, саясий өнөктүккө байкот жарыялоого чакырышкан. Мындан тышкары алар шайлоонун жыйынтыгына каршы чыгышкан.

12-июнь инаугурация күнү Токаев батыш басылмаларына берген интервьюсунда тоскоолдуксуз митинг өткөрүүгө мүмкүнчүлүк берилерин, мыйзам кабыл алынарын айткан.

www.