656 Бардыгы /

БИШКЕК. Президент Сооронбай Жээнбеков Бишкек шаарындагы «Манас айылы» маданий-этнографиялык комплексинин абалы менен жеринде таанышты.
Адегенде Сооронбай Жээнбеков туура башкаруу жана каражаттарды тартууда «Манас айылы» Бишкек шаарынын маданий дөөлөтү боло алаарына терең ишенгендигин ачык билдирди.  Маданият маалымат жана туризм министри Азамат Жаманкулов «Манас айылын» жаңы форматта калыбына келтирүү боюнча кызматташууга жергиликтүү инвесторлор абдан кызыгып жатышкандыгын жашырган жок. Өкмөт мүчөсү «Манас айылы» Кыргыз Републикасынын Маданият, маалымат жана туризм министрлигинин балансына өткөрүлсө, реконструкциянын варианттары каралып чыгаарын дагы баса белгиледи. Ошол эле учурда Президент Сооронбай Жээнбеков «Манас айылын» министрликтин балансына өткөрүү идеясын абдан катуу колдоду.

Бишкек шаарындагы «Манас айылы» маданий-этнографиялык комплекси реконструкция кылуу маалында Президент мамлекеттик-жеке өнөктөштүктүн механизмдерин активдүү колдонууга чакырды жана ошондой эле аны реконструкция кылуу жана этно-шаарча куруу мүмкүнчүлүгүн дагы кеңири кароону сунуш этти. Ал баса белгилегендей, бул жер борбор калаанын тургундарынын жана конокторунун, ошондой эле чет элдик туристтердин толук кандуу эс алуу жайына айланышы кажет!
Айтмакчы, Бишкек шаарындагы «Манас айылы» маданий-этнографиялык комплекси 1998-жылы Бишкек шаарынын мэриясынын балансынан «Бишкек» Эркин экономикалык аймактын башкы дирекциясынын балансына биротоло өткөрүлүп берилген. Ушул тапта «Манас айылы» комплексинин абалы абдан эле начар. Комплексти куруу иштери 1995-жылы «Манас» эпосунун 1000 жылдыгын майрамдоого карата башталган эле.

Алишер Токсонбаев, өз кабарчы