772 Бардыгы /

ОРУСИЯ. Кыргыз Республикасынын Орусиядагы элчилигинин жана Кыргыз Өкмөтүнө караштуу Миграция кызматынын Орусиядагы Өкүлчүлүгүнүн кызматкерлери Орусиянын Пермь жана Самара шаарларында туруктуу жашап жатышкан Кыргыз диаспорасынын өкүлдөрү – мекендештери менен жолугушту.
Адегенде жолугушуунун катышуучуларына Орусия Федерациясынын аймагындагы Кыргыз биримдиктери менен өз ара аракеттерди ишке ашыруу  багытында элчиликтин ишмердүүлүгү туурасында кеңири маалымат берилди. Тактап айтканда, Кыргыз Республикасынын жарандарынун укуктарын жана кызыкчылыктарын коргоо иштерин күчөтүү, ошондой эле маданий-гуманитардык иш-чараларды биргелешип уюштуруп өткөрүү маселелери кенен-чонон талкууланды. Ошондой эле мекендештерге укук жана консулдук маселелер боюнча кеп-кеңештер берилип, катышуучулар тийиштүү жоопторду дагы алышты. Ошону менен бирге айрым жарандардан консулдук документтери боюнча тиешелүү материалдар дагы кабыл алынды.
Мындан тышкары жолугушуунун жүрүшүндө Кыргыз жарандарына «Elchi.ru» аталган Кыргызстандын Орусиядагы элчисинин электрондук блогу сунушталды. Аталган www.elchi.ru сайты аркылуу Орусияда жүрүшкөн мекендештер онлайн тартибинде  консулдук-укуктук маселелер боюнча тийиштүү кеп-кеңеш, жоопторду дагы ала алышат. Кездешүү маалында мекендештерге миграция чөйрөсүндөгү эң актуалдуу маалыматтар камтылган материалдар дагы таркатылып, Кыргызстандын инвестициялык мүмкүнчүлүктөрү жана чет өлкөдөгү мекендештер арасындагы инвесторлор үчүн түзүлүп жаткан заманбап шарттар тууралуу дагы маалыматтар берилди.

Алишер Токсонбаев, өз кабарчы