975 Бардыгы /

ХАМУРА. Кыргыз Республикасынын Жапониядагы Элчилигинин маданият жана спорт тармагында жүргүзүп жаткан иштеринин алкагында Токио префектурасынын Хамура шаарында Хамура шаарынын Мэриясы тарабынан уюштурулган Кыргыз жана Жапон аткаруучуларынын жана чыгармачыл жамааттарынын катышуусунда Достук концерти тартууланды.

Анда Хамура шаарынын тургундары жана коноктору үчүн Кыргыз аткаруучулары Гүлүм Касымбаева, Калыйман Уметбаева, Жапон ырчысы Мита Ре, Токио Хибискус жапон квартети жана Токио көркөм-өнөр университетинин жапон комузчулары ыр ырдашып, комузда күү ойношту. Ошондой эле аталган иш-чаранын алкагында Кыргыз улуттук боз үйү тигилип, Кыргызстандын кооз жаратылышын чагылдырган сүрөттөр, Кыргыздын улуттук кийим-кечелери, сувенирлери, кийизден жасалган буюмдары жана балынын жармаңкеси, балдар үчүн кол өнөрчүлүк боюнча иш-чара уюштурулуп, Кыргызстан жөнүндө даректүү тасмалар дагы көрсөтүлдү.
Аталган концерттин соңунда 2019-жылдын 25-31-августунда Токио шаарында өтө турган Дүйнөлүк дзюдо чемпионатына катышуучу Кыргыз Республикасынын курама командасын тосуп алуу боюнча расмий азем дагы өткөрүлдү. Кыргыз жана Жапон тарабынын ортосундагы мурда жетишилген макулдашууларга ылайык Кыргыз дзюдоистери Хамура шаарында ушул тапта катуу машыгып жатышат.

Алишер Токсонбаев, өз кабарчы