650 Бардыгы /

Mozilla жана Google компаниялары «казак бийлигинин өлкө ичиндеги интернет-трафикти колго алуу аракетине бөгөт коюу» максатында жаңы технологиялык чечимдерди ишке киргизет.

Mozilla компаниясынын расмий билдирүүсүндө мындай чечим казак интернет-провайдерлери браузерлерге «мамлекеттик сертификаттарды орнотууну» талап кылып жаткандыктан улам кабыл алынганы жазылган. Анда бул сертификаттар «өкмөттүн колдонуучулардын бардык маалыматтарына ээ болуусуна жол ача турганы» белгиленген.

«Биз мындай кадамга барууну каалаган эмеспиз, бирок колдонуучулар менен Интернеттин бүтүндүгүн коргоо — биздин браузердин базалык принциби болуп эсептелет», — деп билдирди компаниянын коопсуздук бөлүмүнүн директору Маршалл Эрвин.

Буга окшогон билдирүү Google компаниясынын расмий блогуна дагы жарыяланды. Анда жаңы технологиялык чечимдер «казак бийлигинин сертификаттарына бөгөт коё тургандыгы» жазылган.

«Биз бул конкреттүү көйгөй боюнча коргоо чараларын кабыл алдык. Мындан кийин дагы дүйнө жүзүндөгү колдонуучуларды коргоо үчүн тиешелүү чараларды көрө беребиз», — деп белгиледи Chrome браузеринин технологиялар боюнча директору Парис Табриз.

Apple компаниясы алардын Safari браузеринде «коопсуздук сертификаттарын» бөгөттөө үчүн чаралар каралганын белгилеп, Qaznet Trust Network ишенимдүү сертификаттардын тизмесинен чыгарылганын билдирди.

Казакстанда «коопсуздук сертификаттарын» киргизүү иштери быйыл июлда башталган. Учурда өлкөнүн байланыш операторлору колдонуучуларга Qaznet Trust Network сертификатын орнотуу чакырыктары жазылган СМС-билдирүүлөрдү жөнөтүп, ал киберчабуулдар менен зыяндуу маалыматтардан коргой турганын билдирүүдө.

Бул технологияны киберкоопсуздук боюнча адистер менен укук коргоочулар сынга алып келишет. Алар өкмөттүн сертификаты маалыматтарды чогултууга жана колдонуучуларды аңдууга арналганын билдирип, бийлик анын жардамы менен өлкөдөгү интернетке көзөмөлдү күчөтүүнү көздөп жатканын билдиришүүдө.

www.