БАКАЛБАЙ КАЛМАМАТОВ: “БИЗДИН ЛИЦЕЙДИ БҮТҮРГӨНДӨРГӨ ЖУМУШ ОҢОЙ ТАБЫЛАТ”

2,140 Бардыгы /

Ош шаарындагы легендарлуу 12-кесиптик лицей акыркы жылдарда заман талабына ылайык тың адистерди гана кыска мөөнөттө белендегенге абдан бекем ыктады. Бул окуу жайын бүтүргөндөрдү Кыргызстандан эле эмес Европа өлкөлөрүнөн дагы байма-бай жолуктурасыз. Андыктан, аталган лицейдин директору, педагогика илимдеринин кандидаты Бакалбай КАЛМАМАТОВду иш үстүндө капы-тапыл кепке тарттык.
– Бакалбай мырза, ыркыраган рынок талабына туруштук
бере албастан көптөгөн кесиптик-техникалык окуу жайлары (КТОЖдор) биротоло жоюлуп кетпедиби. А Сиздер бул атактуу 12-кесиптик лицейди деги кантип сактап калдыңыздар?
– Мунун анчалык деле сыры жок. Биз дагы эле Өкмөттүн
алдындагы Кесиптик билим берүү агенттигине карайбыз. Андыктан, адегенде жетекчилигибиз менен кеңешип-таңашып, анан дароо эле эмгек рыногуна ылайыкташкан кадрларды ыкчам жана абдан сапаттуу белендегенге өтө катуу кириштик.
– Маселен?
– Мисалы, Ош шаарындагы 12-кесиптик лицейде электр жана
газ ширетүүчүлөр, чач тарачтар, ашпозчулар, сантехниктер, слесарлар, электр жабдыктарын оңдоочу жана тигүүчүлөр үстөккө-босток даярдалат. Быягы Баткен, тиягы Жалал-Абад облустарынан, ал эми Ош облусунун бардык район-шаарларынан кыз-уландар биздин лицейде көбүрөөк билим алып жатышат. Мүмкүнчүлүктөн пайдаланып айтып коюуга тийишмин, 12-кесиптик лицейди бүтүрөндөргө жумуш оңой табылат.
– Кантип?
– Быйыл эле 260 окуучуну уябыздан учурдук эле. Баары тең
ушул тапта өздөрүнө ылайык иш таап кетишти. Биздин дипломубуз КМШ өлкөлөрүндө бүт жарактуу. Ал эми бүтүрүүчүлөрүбүз а түгүл тээтигил Европа мамлекеттеринде дагы абдан ийгиликтүү иштеп жатышат. Демек, биз белендеген адистерге азыркы эмгек рыногунун талабы абдан күч!
– Бакалбай мырза, дасыккан жетекчи сыңары Сиз
Кыргызстандын келечегин деги эмнеден көрөсүз?
– Байкап жаткандырсыздар, Кыргызстанда акыркы жылдарда
жеңил өнөр жайы жана курулуш тармактары бара-бара бутуна туруп, ыкчам түрдө өнүгүп баратат. Ага жараша өндүрүш дагы улам оожалуу жолунда. Демек, ушундай шарттарда биз даярдаган адистерге таңкыстык мындан дагы күчөйт. А биз ошол таңкыстыкты басаңдатуу үчүн гана иштемекчибиз.