1,031 Бардыгы /

НАРЫН. Кыргыз Республикасынын Президенти Сооронбай Жээнбеков эки күндүк иш сапары менен Нарын облусун кыдырды.  

Мамлекет башчысы Сооронбай Жээнбеков адегенде Ак-Талаа районунун жашоочулары менен жолугушуп, мамлекеттик аймактык өнүгүү саясаты, айыл чарбасын жана аймактарды колдоо боюнча каржы институттарынын ишмердиги, жер-жерлерге инвестицияларды тартуу, таза суу жана ирригация боюнча долбоорлор, сот-укуктук реформанын жүрүшү, жемкорлук менен күрөшүү чаралары, өлкөнү санариптештирүү жөнүндө кеңири баян этти.

Президент менен болгон жолугушууда Ак-Талаа районунун жашоочулары сугат суусунун, турак жай курууга жер тилкелеринин жетишсиздиги, бийик тоолуу райондордун жашоочуларына жеңилдиктер, жолдорду, социалдык обьектилерди куруу жана оңдоп-түзөө, жумушчу орундарын түзүү боюнча суроолорду узатышты. Элеттиктердин суроолоруна Президент Сооронбай Жээнбеков менен бирге өлкөнүн тиешелүү министрликтери жана ведомстволорунун жетекчилери дагы жооп беришти. Президент жергиликтүү тургундардын оозеки берилген суроолорунун бардыгына кеңири жооп кайтарып, жолугушуунун жүрүшүндө берилген жазуу түрүндөгү суроолор дагы жоопсуз калбашына бекем ишендирди. Ак-талаалыктар менен жолугушуу төрт сааттан ашык созулду.

Нарын облусуна иш сапардын алкагында Президент «Сүт-азык» ЖАК сүттү кайра иштетүүчү ишканасына баш бакты. Нарын шаарын таза суу менен камсыздоо жана канализациялык системаларды калыбына келтирүү боюнча долбоорду ишке ашыруунун жүрүшү, Ак-Талаа районунда кошумча 4000 гектардан ашуун жерге сугат суу жеткирип, пайдаланылып жаткан сугат жерлерди сугарууну жакшыртууга мүмкүнчүлүк түзгөн ирригациялык долбоорлор менен дагы кеңири таанышты.Президент Сооронбай Жээнбеков ошондой эле ички жолдорду реконструкциялоо жана Ак-Талаа районундагы мектепти куруунун жүрүшү менен дагы жеринде таанышты.

Алишер ТОКСОНБАЕВ, өз кабарчы