789 Бардыгы /

БИШКЕК. Кыргыз Республикасынын Тышкы иштер министри Чыңгыз Айдарбеков Казакстандын  Кыргызстандагы  Элчиси Карим Кокрекбаевди анын дипломатиялык вазийпасынын аяктагандыгына байланыштуу кабыл алды.

Жолугушуунун жүрүшүндө тараптар эки тараптуу күн тартибинин актуалдуу маселелерин, ошондой эле ушул жылдын 12-июлунда Казакстан Республикасынын Премьер-министри Аскар Маминдин Кыргыз Республикасына жасаган расмий сапарынын жана Кыргыз-Казак Өкмөттөр аралык Кеңешинин 8-отурумунун жыйынтыктары боюнча жетишилген макулдашууларды ишке ашырууну дагы талкуулашты. Ушул жылдын күз мезгилинде Казакстан Президенти Касым-Жомарт Токаевдин Кыргыз Республикасына жасай турган мамлекеттик сапарына даярдык көрүүгө өзгөчө көңүл бурулду.

Министр Чыңгыз Айдарбеков Элчи К.Кокрекбаевге Кыргыз-Казак мамилелерин өнүктүрүүдөгү жемиштүү ишине жана жеке салымы үчүн терең ыраазычылыгын билдирди жана анын мындан аркы ишмердүүлүгүнө дагы ийгиликтеди каалады. Өз кезегинде Казак Элчиси К.Кокрекбаев анын Кыргызстандагы дипломатиялык кызматы мезгилиндеги биргелешкен үзүрлүү өз ара аракеттенүүлөрүнө ыраазычылыгын ачыктады.

Алишер ТОКСОНБЕВ, өз кабарчы