610 Бардыгы /

Казакстандын борбору Нур-Султанда уруксат берилбеген митингге катышуу айыбы менен 26 киши кармалды. Бул тууралуу өлкөнүн Ички иштер министрлиги кабарлады.

Алар Кытайдын экономикалык таасиринин күчөшүнө каршы чыгып, Шинжаңда куугунтукталып жаткан казактарды коргоону, Казакстандагы саясий репрессиянын курмандыктарын бошотууну талап кылышкан.

Чымкент жана Актөбө шаарларында да бир нече киши кармалды. Айрым кишилерге күч колдонулганы айтылууда.

Буга чейин оппозиционер, чет өлкөдө бозгунда жүргөн мурдагы банкир Мухтар Аблязов 26-октябрда жаштарды көчөгө чыгууга чакырган. 25-октябрда Казакстан башкы прокурорунун орун басары Булат Дембаев уруксат берилбеген митингге катышкандар жоопкерчиликке тартыларын эскерткен.

Сентябрда Нур-Султан, Алматы жана Чымкент шаарларында Казакстанда кытай заводдорун курууга каршы чыккандар митингге чыгышкан. Өлкө боюча жүздөй киши кармалган.

www.