Анын айтымында, күбөлүк аларга бүгүн 29-октябрда берилет деп күтүлүүдө.

— 28-октябрда Миграциялык полициянын өкүлдөрү тергөө абагына барып, айыпталуучуларды сүрөткө тартып, анкета толтуртуп алышты. Эми аларга Казакстандын аймагында башкалка сураган адамдарга бериле турган күбөлүк тапшырылат. Бул документтин негизинде качкын макамы берилет, — деп билдирди Азанов «Фергана» агенттигине.

Анын айтымында, эми шинжаңдык казактар качкын макамын алышы үчүн, аларга каршы козголгон кылмыш ишин токтотууга аракет кылуу зарыл.

30 жаштагы Кастер Мусаханулы менен 25 жаштагы Мурагер Алимулы 1-октябрда Кытайдын мамлекеттик чек арасынан өтүшкөн. Алар кытай-казак чек арасынын ортосундагы бейтарап аймакта беш күн жүрүп, 6-октябрда Чыгыш Казакстан облусунун Шиликти айылы аркылуу Казакстанга келишкен.

Алар Кытайдын аз улуттун өкүлдөрүнө карата жүргүзүп жаткан саясатына чыдабай, үй-бүлөлөрүн таштап, качып кетүүгө аргасыз болгонун айтышкан. Кастер Мусаханулы 14-октябрдагы маалымат жыйынында Шинжаңдагы “лагерде” болгонун, ал жерде ур-токмокко кабылганын айткан.

Мусаханулы менен Алимулы ошол эле күнү Алматыдагы миграциялык полицияга баратканда кармалышкан. 15-октябрда алар Кытай менен чектешкен Чыгыш-Казакстан облусундагы Зайсан шаарын жеткирилгени белгилүү болгон.

20-октябрда Зайсан шаардык соту Мусаханулы менен Алимулыны камакка алуу чечимин чыгарып, алар Өскемен шаарындагы тергөө абагына жеткирилген.