Жергиликтүү бийлик өкүлдөрүнүн билдиришинче, түрттүрүлгөн үй үчүн ири өлчөмдө компенсация төлөнүп, анын ордуна Медициналык институт курулат. Самарканд шаарынын башчысынын жардамчысы Бобурмирзо Облокулов имарат үчүн учурда 127,5 миң доллар сунушталып жатканын билдирди.

Израилде жашаган имараттын ээси Михаэл Шор Өзбекстанга келип, жеке менчигин коргой турганын билдирди. Ал компенсация үчүн үйүн түрттүрүүгө жол бербей турганын айтты.

Бул арада Маданий мурастарды сактоо боюнча мамлекеттик инспекция ЮНЕСКОнун тизмесиндеги тарыхый жайлардын аймагында түрттүрүү иштерин жүргүзүү мыйзамга каршы келерин билдирүүдө.

Былтыр ЮНЕСКОнун талаптарына карабай, Самарканддын тарыхый бөлүгүндө курулуш жүргүзүүгө уруксат бергени үчүн ондон ашуун аткаминер кармалган. Алар соттун чечими менен ар кыл мөөнөткө эркинен ажыратылган.