3,087 Бардыгы /

ЖАЛАЛ-АБАД. Базар-Коргон районунун Могол айыл аймагында заманбап оорукана курулуп жатат.

Курулуштун капсуласын салуу иш-чарасына ЖК депутаты, вице-спикер М.Бакиров, А.Алтынбеков, вице-премьер министр А.Өмүрбекова, Өкмөттүн Жалал-Абад областындагы өкүлүнүн орун басары Ы.Ызабеков, Жалал-Абад областтык саламаттык сактоо координатору Н.Эрматов, Базар-Коргон районунун акими А.Бегимкулов, жергиликтүү жетекчилер жана тургундар катышты.

Жаңы курула турган оорукана республикалык бюджеттин эсебинен каржыланат. Курулуштун сметалык баасы 113 683 193 миң сомго тендерге коюлуп, “Сантекх монтаж” ЖЧКсы 87 940 117 миң сомго утуп алган. Айылдык оорукананын биринчи кабатында № 1 жана №2 үй-бүлөлүк дарыгерлер тобу жайгаштырылат. Ал эми экинчи кабатында 60 керебет (койка) орундук айылдык бейтапканага ылайыкташтырылат. Мындан сырткары терапевдик, төрөт бөлүмдөрү да иштейт. Ошондой эле тез жардам бөлүмү да орун алып, анда 2 дарыгер, 5 мээрбан, 1 кичи мээрбан жана 4 айдоочу кызмат кылмакчы.

Бул оорукана бүтсө, үч айыл аймактын 45-50 миңге жакын тургуну сапаттуу медициналык жардамын пайдалана алышат.

Белгилей кетсек, Могол айылдык ооруканасы 1952-жылы салынган. Бул ооруканада убагында хирургия, терапия жана төрөт бөлүмдөрү 1985-жылга чейин иштеген. Андан кийин аталган оорукана авариялык абалга кептелип, ушул күнгө чейин иштебей турган. Мындан улам аймактагы калк 50-60 чакырым алыстыктагы райондук ооруканага каттап, кыйынчылык тартып келишкен.

Бүбүсара ОРОЗАЛИЕВА, “Аймак”