КЫРГЫЗ ЭЛЧИСИ КОРЕЯЛЫКТАР МЕНЕН АЧЫК-АЙКЫН СҮЙЛӨШТҮ

800 Бардыгы /

ЧОЛЛА-ПУКТО. Кыргызстандын Кореядагы Элчиси Динара Кемелова Чолла-Пукто аймагына сапарлап, бул өлкөнүн Айыл чарба аймактарын өнүктүрүү Мамлекеттик Администрациясынын жетекчилиги, өз алдынча башкаруу органдары, медиа тармагынын өкүлдөрү жана ишкерлер, ошондой эле Чонбук Университетинин ректору менен жолугушту.

Сапарынын алкагында Кыргыз Элчиси Динара Кемелова Чолла-Пукто аймагынын губернатору, аймактык Кеңештин Төрагасы, Чонджу шаарынын мэри, Чолла-Пуктот уристтик ассоциациясынын жетекчиси менен эки тараптуу жолугушту. Буга улай Кыргыз жарандары эмгектенишкен “Export Packing Co.LTD” компаниясына баш багып, мекендештери менен дагы кенен-чонон баарлашты.

Ошондой эле Корея Республикасынын аймактарды өнүктүрүү Мамлекеттик Администрациясынын жетекчилиги менен кездешкенде, Айыл чарба долбоорлорун ишке ашыруу максатында Кыргыз Республикасында Корей Эл аралык айыл чарба Программасынын Борборун ачууну талкуулашты. Буга улай тараптар Кореянын айыл чарба тармагында инновациялык технологиялары жана “Акылдуу ферма” (Smart Farming) долбоорлорун өнүктүрүү тажрыйбасын өз ара үйрөнүүнү дагы акылдашышты.

Чолла-Пукто аймагынын губернатору СоңХа-джин жана Аймактык Кеңештин Төрагасы Соң Сон Хван менен жолугушууда Чүй облусу менен бир тууган аймактар байланышын түзүү жаатында жана Кыргызстандын айыл чарба, өндүрүш тармагына инвестиция тартуу, туристтик алмашууларды өнүктүрүү, адистерди биргелешип даярдоо менен бирге Кыргызстандан эмгек жумушчуларын чакыруу тууралуу маселелер дагы талкууланды. Ал эми Чонджу шаарынын Вице-мэри Яң Вон Ким мырза менен Жалал-Абад жана Чонджу шаарларынын ортосундагы кызматташуу дараметин жана шаардын жашоочуларына Кыргызстандын туристтик, ошондой эле инвестициялык мүмкүнчүлүгүн кеңири пропагандалоого, өндүрүш тармагы менен биргелешкен этно маданияттык долбоорлорду ишке ашыруу жөнүндө орой-чарай талкуулашты.

Соңунда Чонбук Улуттук университетинин ректору Доң Вон Ким мырза менен Кыргызстандык студенттердин санын көбөйтүү мүмкүнчүлүгү жана Кыргыз Республикасынын университеттери менен окуу жайлар аралык байланышты кеңейтүү жагы катуу талкууланды.