3,251 Бардыгы /

Китеп окуган жакшы, дегенибиз менен бизде коомдук унааларда же жайларда андайларды жолуктурууга болбой калды беле?

Прагада адамдар баскан-турган жеринде телефонго үңүлүп, жабышпай, китеп эле окуй беришет экен, көздү күйгүзүп. Мындайлар оро-пара жолуга берет. Аларды да тартып алайын деп пайласам, жакын туруп калыппыз, “эй, ниме” деп жибереби, деп тартынып калдым, даа, болбосочу…

Мына бул статуя дейбизби, ошо биз, чехтер китеп окуганды кыйын жакшы көрөбүз да дегенди даңазалаган символикасы окшойт, муну болсо шарт эле ояк-буягынан тарта калдым.

Ал эми бул мырза трамвайда кетип жатканда каршы тарапта отурганын көзүм чалып калып, бир аялдамада адамдар сыртка бир тобу сүрүлүп түшүп, бир тобу кайра чыга турган ирмемде тарта калдым, ухх.

Бул жакка, сиздердин назарыңыздарга коердо “бул мырза, кокусунан интернет желеден өзүн көрүп калып “эй, кандай немесин, өзү, уятың барбы, аа, эмнеге мени уруксат-пуруксаты жок эле сүрөткө тартып алдын, аа, акыры, бир ооз сурабайт белең, кандай акың бар сенин, аа, өзү журналисттик этика-петиканы билесиңби же ошо балаани да билбейт окшойсуң, ааа” десе эмне дейм деп, да ойлоно калдым.

Бирок, кайра кое берейинчи, бир деме дей турган болсо “кечиресиз мырза, мен сиздин бирөөнүн кызарган жерин үзүп алган митайымдыгыңызды, коомдук мүлккө кол салган карасанатайлыгыңызды, уурулугуңузду, ж.б. чагылдырып жатамынбы, кайра китеп окуган үлгүлүү көрүнүшүңүз көпчүлүккө жагат го, деп эле ойлогонмун десем, ии, ооба, кечиресиз Зирек айым, деп калса керек”, деп коюп койдум.

Ошо, кеттик анда, китеп окуйбуз!

Зирек АСАНОВА

Прага шаары, Чехия Республикасы