777 Бардыгы /

19-ноябрда Алматынын Алмалы райондук соту өлкөдө тыюу салынган «Казакстандын демократиялык тандоосу» кыймылынын ишмердүүлүгүнө катышууга айыпталган төрт активистке карата өкүм чыгарды.

Ага ылайык, Оксана Шевчук, Гүлзипа Жаукерова, Жазира Демеуова жана Ануар Аширалиев бир жылга эркинен ажыратылды. Мындан тышкары көп балалуу Шевчуктан башкасынын баары коомдук жумушка тартылат.

Муну менен катар сот айыпталуучулардын бөгөт чарасын өзгөртүп, Шевчук, Жаукерова жана Аширалиев сот залынан бошотулду. Жазира Демеуова сентябрдан бери үй камагында болчу.

Сотто мамлекеттик айыптоочу ар бирин эки жылга эркинен ажыратуу тууралуу өтүнүч келтирген. Прокурорлор алардын күнөөсү тергөөдө далилденгенин айтып, суракта басым-кысымга кабылганы тууралуу дооматтарды четке кагышкан.

Августта казакстандык укук коргоочулар айыпталуучуларды саясий туткундардын тизмесине киргизген.

«Казакстандын демократиялык тандоосу» кыймылын бозгундагы банкир Мухтар Аблязов негиздеген. Ал буга чейин казак жарандарын өкмөткө жана бийликке каршы акцияларды өткөрүүгө чакырган.

www.