1,611 Бардыгы /

Өткөн аптада Жалал-Абад шаарында 150дөн ашуун демилгелүү жаштардын, чет элдик спикерлердин катышуусунда масштабдуу “Демилгелүү жаштар” форуму өттү.

Бул форумга жергиликтүү бийлик өкүлдөрү, эл аралык уюмдар, жумушчу топтор жана 18 жаштан 28 жашка чейинки 150дөн ашуун КРдин жаштары катышты. Ошондой эле Украина жана Армениядан жаш спикерлер чакырылган.

Иш-чаранын башкы максаты – жаштардын жарандык активдүүлүгүн өнүктүрүү, эң алдыңкы улуттук, эл аралык тажрыйбалар боюнча маалымат берүү болуп саналат. Аталган форум эки жылдан бери өтүп, алгачкысы 2018-жылы жаштардын ишмердүүлүгү боюнча Бишкек шаарында болгон.

Форумдун жүрүшүндө Украина жана Армениядан келген жаш спикерлер алардын өлкөсүнүн өнүгүүсүнө жаштардын салымы кандай болгону тууралуу айтып беришти. Жыйынтыгында форумдун катышуучулары өлкө жаштарынын активдүүлүгүн арттырууда сунуш-нускамалар жана ошондой эле медиа мейкиндигине атайын медиапродукт иштеп чыгышты.

Уюштуруучулардын айтымында, жаштар – социалдык топ катары өлкөдөгү саясий-экономикалык, социалдык маанилүү чечим кабыл алуу процесстеринин жигердүү катышуучусу болуш керек. Эгер жаштар бардык керектүү шаймандар менен камсыз болсо, ошол эле критикалык ой жүгүртүү, маалымат-укуктук жана медиа сабаттуулук боюнча мамлекетке оң таасирин тийгизген өзгөрүүлөргө алып келет.

Белгилей кетсек, “Демилгелүү жаштар” долбоору 2 жылдан бери өлкөнүн алдыңкы  жаштарынын башын бириктирип, алардын мүмкүнчүлүктөрүн жакшыртуу маселелерин алга сүрөшөт. 5 жылдык мөөнөттөгү бул долбоор 2017-жылы октябрь айында башталган, 2022-жылы аяктайт. Эл аралык өнүктүрүү агенттиги (USAID) тарабынан каржыланып, өзүнүн алты өнөктөшү менен иш алып барат.

Бүбүсара ОРОЗАЛИЕВА, “Аймак”