3,453 Бардыгы /

Шырдак – кийизден жасалып, оюулары шырылып тигилген, боз үйлөргө, жерге салынуучу үй буюму. Шырдакты койдун, козунун жүнүнөн кийиз жасап, бышырып, боеп, оюу түшүрүп, саймаларын шырып тигип жасашат. Ар бир иштин өз кыйынчылыгы бар эмеспи, шырдак жасаган да оңой эмес тура. Умай энелерибиздин жолун улап шырдак, төрбөлжүн, ала кийиздерди жасаган уз энелер, апалар, эжелер азыркы убакта аз кездешет. Ошентседа салт-санааны жокко чыгарбай, мал багып, кийиз бышырып, шырдак шырып, бир топ жылдан бери алектенгендер бар.

Жалал-Абад областындагы Ала-Бука районунунда жаштардын ынтымагын чыңдоо, илгертен келе жаткан чеберчиликти улантуу, органикалык продукцияны таза жана сапаттуу чыгаруу максатында дыйкандар, малчылар, уз-чебер кыз-келиндер арасында «Алтын күз» майрамы жана «Шырдак» фестивалы өткөрүлдү. Конкурска Ала-Бука районуна караштуу Актам, Өрүктү, Көк-Таш, Көк-Серек айылынын тургундары катышып, ак төөнүн карды жарылган алтын күз айында алма, өрүк, жүзүм, курма, өздөрүнүн жеке чарбачылыгындагы мөмө-жемиш, жашылча, өсүмдүктөрүн, малчылар болсо санынан сапатын жогору баалашып башка мамлекеттен алып келинген эт багытындагы, сүт багытындагы уй-койлорун, ал эми уз-чебер айымдар өз колдорунан жасаган ала кийиз, төрбөлжүн, шырдак, кийизден жасалган буюмдарды алып келишти. Кызыктуу жумуш болгондуктан «Шырдак» фестивалына жаш-кары дебей чебер кыз-келиндер баары катышты. Катышкандар конкурска атайылап 10-15-20 дан шырдактарды шырып, кийизден түрдүү буюмдарды жасап келишти. Жыйынтыгында жакшы жасап, мыкты оюуларды түшүргөн чыныгы уздар аныкталып, сыйлыктар тапшырылды.

Ар бир кесип ардактуу деп бекеринен айтпаса керек, жаш кезинен эле үйүндө апасынын жасаганын көрүп, жардам берип, кызыгып сурап жүрүп, үйрөнүп алып, энесиннин жолун улашып, 20 жылдан ашык убакыттан бери алектенип келишет. Кыз узатып, келин алып, той бергенде да кызга сеп, себине шырдак кошуп беришет. Ата-Бабаларыбыздан бери келе жаткан шырдактын ден соолукка пайдасы зор. Боз үйлөргө, жерлерге салынып, кышында жылуу болуп, оюмдары көңүлдү өзүнө тартып турат. Ушундай конкурстар бат-бат уюштурулуп турса, кийиз-шырдактарды мыкты жасап, түркүн оюмдарды түшүрүшүп, мыкты уз-чеберлер көбөйүшүп, салтыбыз унутта калбай уланат. Так эле «Шырдак» фестивалы Аксы жергесинде уюштурулушун сунуштайм,

анткени биздин жергебизде да ууз-чеберчилик менен алектенген айымдар бар, мындай конкурстар уюштурулуп, көргөзмө кылышып, сыйлактарды алышса, өз жумушуна дагы да кызыгып, болгон аракетин жумшап, дагы да терең иштешмек.

Асылгүл СУЛТАН кызы, Кербен шаары.