1,007 Бардыгы /

ПАРИЖ.  ЮНЕСКОнун Башкы конференциясынын 40-сессиясынын аянтчасында Кыргыз Республикасынын Тышкы иштер министри Чыңгыз Айдарбеков Билим берүү, илим жана маданият боюнча Ислам уюмунун (ИСЕСКОнун) Баш директору доктор Салим Аль Малики менен дагы эки тараптуу жолугушту.

Бул жолугушуунун жүрүшүндө Чыңгыз Айдарбеков доктор Аль Маликини ИСЕСКОнун Башкы директор кызмат ордуна жакында шайланышы менен куттуктады. Ошондой эле ага бул жооптуу кызматта ийгиликтерди гана каалады. Уюмдун астында мүчө мамлекеттердин ортосундагы өз ара түшүнүшүүнү, биримдикти жана тилектештикти бекемдөө жана Ислам дүйнөсүн Эл аралык алкакта татыктуу көрсөтүү боюнча асыл максаттары менен бөлүштү.

Андан соң тараптар ИСЕСКОго мүчө-мамлекеттердин ортосундагы кызматташтыктын олуттуу дарамети жана мүмкүнчүлүктөрү дагы ишке ашырыла электигин белгилешти. Ушуга байланыштуу, келечектүү долбоорлор жана ИСЕСКОнун ишмердүүлүгүнүн негизги багыттарынын бардык жагдайы жаатында кызматташтыкты кеңейтүү жана мындан ары тереңдетүү мүмкүнчүлүктөрү ачык талкууланды.

Жолугушуу соңунда Чыңгыз Айдарбеков Кыргызстан ИСЕСКОнун ишмердүүлүүгүнө мындан ары дагы активдүү катышаарына жана стратегиялык максаттарды ийгиликтүү чечүү үчүн Уюмду реформалоо боюнча күч-аракеттерди колдооруна катуу ишендирди.
Жолугушууга ошондой эле Кыргызстандын Маданият, маалымат, туризм министри Азамат Жаманкулов дагы катышты.

Алишер ТОКСОНБАЕВ, өз кабарчы