2,316 Бардыгы /

Айгыр-Жал айылында жайгашкан №6-Үй бүлөлүк дарыгерлер тобунун буга чейин жараксыз абалга келип калган имараты капиталдык оңдоп-түзөөдөн өткөрүлдү.

Атап айтканда, бейтапкананын имаратынын ичи-тышы толук оңдолуп, эшик-терезелери алмаштырылып, имараттын ичине ысык суу киргизилип, ички ажаткана курулуп, полдору сырдалып, имарат евро үлгүдө заманбап түргө келтирилди.

Үй-бүлөлүк дарыгерлер тобунун башчысы Байызбек Балташев бейтапканага кошумча серолаборатория жана жугуштуу ооруларды дарылоочу бөлүм ачууну максат кылууда. Ушул максатта имараттын бир жагын курулушчуларга ичтен бөлдүрүп,​ аталган бөлүмдөргө ылайыкташтырды.

–Эми КРдин Саламаттыкты сактоо министрлигине атайын кайрылуу жолдоону максат кылуудабыз. Эгерде максатыбыз ишке ашып калса биздин мекемеде серолаборатория жана жугуштуу оорулар бөлүмү ачылат-дейт Б. Балташев.

Тактай кетчү нерсе, өткөн 2018-жылы Каныш-Кыя айыл аймагынын каржылоосу менен мекемеге 860 миң сомдон ашуун каражатка “Тез жардам” автоунаасы туруучу заманбап гараж жана 756 миң сомго мекеменин айланасы жалпы  узундугу 300 метр заманбап темир тосмо менен тосулган.

Быйылкы мекеменин капиталдык оңдоп-түзөө иштерине түрткү берүүчү гранттын эсебинен  жалпы 4 млн. 300 миң сом акча каражаты жумшалды.

Эскерте кетсек, аталган имарат 1987-жылы амбулатордук бөлүм катары ачылгандан бери утурумдук оңдоп-түзөөлөрдү эсепке албаганда капиталдык оңдоп-түзөөдөн өткөн эмес. Андан сырткары Чаткал районунда жугуштуу оорулар бөлүмү жок.

“Аймак”