998 Бардыгы /

«Чек арасыз кабарчылар» укук коргоо уюму WikiLeaks сайтынын негиздөөчүсү Жулиан Ассанжды Лондондогу абактан бошотууга чакырды.

Укук коргоочулардын айтымында, Ассанждын абалы кескин начарлап кеткен. Буга байланыштуу уюм АКШга кайрылып, WikiLeaks сайтынын негиздөөчүсүнөн тыңчылык айыбын алып салып, аны экстрадициялоо аракетинен баш тартууну өтүнгөн.

Вашингтон Пентагондун жашыруун документтерин мыйзамсыз алууга жана жарыялоого байланышкан бир катар айыптоолор боюнча Улуу Британиядан Ассанжды экстрадициялоону талап кылууда. Кошмо Штаттарда ал жалпысынан 175 жылга эркинен ажыратылышы мүмкүн.

Бир ай мурда ондогон дарыгер абакта Ассанждын өмүрүнө коркунуч бар экенин, ал медициналык жардамга муктаж экенин билдиришкен.

Ассанж 2012-жылы аны «Зордуктоо» беренеси менен айыптап жаткан Швецияга экстрадиция болуудан качып, Эквадордун Лондондогу элчилигинде убактылуу башпаанек тапкан. Быйыл апрелде Эквадор ага башкалка берүүдөн баш тарткан соң британ полициясы аны камакка алган.

Ноябрда Швеция прокуратурасы Ассанждын ишин сотко жөнөтүүгө жетиштүү далил табылбагандыктан, тергөө иши токтотулганын билдирген.

Май айында БУУнун атайын баяндамачысы Нильс Мельцер түрмөдө WikiLeaks сайтынын негиздөөчүсү психологиялык кыйноого кабылып жатканын билдирген. Ал Ассанж өтө тынчсызданып, терең ойго чөмүлүп калганын, аны айланадагы бардык адамдардан коркуу сезими чулгап алганын айткан.

www.