704 Бардыгы /

28-декабрда хорезмдик блогер Нафосат Оллашукурова Үргөнчтөгү психиатриялык ооруканадан чыкты. Бул маалыматты анын атасы Болтабой Оллашукуров ырастады.

Башкы кеңсеси Ташкентте жайгашкан «Эзгулик» укук коргоо уюмунун жетекчиси Абдурахман Ташановдун айтымында, атайын түзүлгөн комиссия блогерди психиатриялык ооруканада дарылоону улантуунун зарылдыгы жок деген чечим чыгарган.

Быйыл сентябрда Үргөнч шаарынын административдик соту 32 жаштагы Нафосат Оллашукурованы «бейбаштык кылган» жана «уруксат берилбеген акцияга катышкан» деп 10 күнгө кескен. Ал ага чейин хорезмдик акын, журналист Махмуд Ражабдын жөө жүрүшүнө катышып, аны «Фейсбук» аркылуу чагылдырып жүргөн. Бирок камалгандан үч күндөн кийин блогер психиатриялык ооруканага жаткырылган. Анда өлкөнүн Башкы прокуратурасы камакка алынган күндүн эртеси Оллашукурованын «психологиялык абалы өзгөргөнүн» билдирген.

Буга чейин бир катар эл аралык уюмдар Оллашукурованы колдогон билдирүүлөрдү жасап, өзбек бийлигин аны бошотууга чакырышкан.

Октябрдын аягында өлкөнүн акыйкатчысы башында турган атайын комиссиянын мүчөлөрү Хорезм облустук психоневрологиялык ооруканасына барып, блогер менен жолугуп чыгышкан. Анда комиссиянын курамындагы активист Оллашукурова бир нече жолу оорулуу эмес экенин кайталап, клиникадан чыгарууну өтүнгөнүн билдирген.

www.