998 Бардыгы /

Иранда украиналык учактын атып түшүрүлгөнүнө байланыштуу өкмөткө каршы нааразылык акциялары уланып жатат. Жекшембиде бийлик демонстранттарды кууп таратуу учурунда көздөн жаш агызуучу газ жана ок атуучу курал колдонгону, бир нече киши жаракат алганы кабарланууда.

Интернетте жарыяланган видеолордо алар Ирандын бийлигин, анын ичинде жогорку руханий лидер Аятолла Али Хаменеини сындашкан.

Тегеранда тартылды делген видеолордо мылтык үндөрүн угууга, жаракат алгандарды көрүүгө болот. Бирок алардын аныктыгы көз карандысыз булактар аркылуу тастыктала элек.

Тегеран полициясы ок чыгарганын мойнуна алган жок. Дүйшөмбүдө тартип сакчыларынын башчысы тескерисинче, демонстранттарга карата сабырдуу мамиле жасоого буйрук берилгенин билдирди.

Тегерандан Киевге багыт алган «Украина эл аралык аба жолдоруна» таандык учак 8-январдын таңында кулап түшкөн. Ичиндеги 176 адамдын баары курман болгон. Иран бийлиги төрт күндөн кийин учакты «кокусунан» атып алганын мойнуна алган. Кырсык Тегеран Ирактагы АКШ аскерлери жайгашкан базаларды аткылагандан бир нече сааттан кийин болгон.

www.