801 Бардыгы /

Казакстандын Коррупцияга каршы кызматы Алматы облусунун тургуну, активист Галина Арзамасовага кол салуу ишинин алкагында Панфилов айыл аймагынын мурдагы акими Нургали Аппазовду кармады.

16-январда коррупцияга каршы кызматтын жеке коопсуздук департаментинин башчысы Мурат Карымсаков активистке чалып, Аппазов кармалганын жана тергөө абагына киргизилгенин айткан.

63 жаштагы Арзамасованы былтыр август айынын аягында Талгар райондук акимчилигинин имаратынын жанынан атып кетишкен. Натыйжада ал жаракат алган. Ошондо бери кылмышка шектүү Аппазов эркиндикте жүргөн. Бир нече күн аралыгында анын баш коргоо чарасы аныкталары күтүлүүдө.

Панфилов айыл аймагынын мурунку акими Нургали Аппазов менен анын айдоочусу Гани Сманов «Бейбаштык» жана «Адамдын саламаттыгына атайылап зыян келтирүү» беренелери боюнча айыпталууда.

14-январдагы сот жараянында прокурор Дамир Дарханбаев айыптоо бүтүмүн окуган. Анда 2017-2019-жылдар аралыгында мурунку аким Нургали Аппазов жарандык активистти коркутуу максатында кишилерди жалдаганы айтылган.

2017-жылы февралда белгисиз адамдар Галина Арзамасованын үйүнө келип, аны көчөгө чакырып сабап кетишкен. 2019-жылы июлда анын автоунаасын өртөө аракети болгон. Анын үйүнүн жанында бир нече жолу асманга ок атышкан.

Арзамасова – аймактагы жайыттар менен сугат суунун жетишсиздиги, жолдордун начардыгы тууралуу маселелерди көтөрүп, «жашыл аймактагы» жерлердин сатылышына каршылык билдирип жүргөн активисттердин бири.

Кийинки сот отуруму 21-январда өтөт.

www.