566 Бардыгы /

Казакстандын Жаркент шаарында мамлекеттик чек арадан мыйзамсыз өткөн деп айыпталып жаткан кытайлык казак Тилек Табарак алты айга эркинен ажыратылды.

Сот чечимине ылайык, анын октябрдан берки камактагы ар бир күнү эки күн деп эсептелинди. Эми өкүм күчүнө кирсе ал эркиндикке чыгат. Судья Динара Куйкабаеванын айтымында, чечим чыгарууда Табарактын буга чейин соттолбогондугу, Казакстанда убактылуу жашоого укук берген документинин бар экендиги жана ата-энесинин казак жараны болгондугу эске алынды.

Буга чейин прокурор Табаракты алты айга эркинен ажыратып, Кытайга депортациялап, Казакстанга кирүүсүнө беш жылга тыюу салууну өтүнгөн. Өз кезегинде айыпталуучу аны Кытайга өткөрүп бербөөнү суранган. Укук коргоочулардын айтымында, Кытайда чек арадан документсиз өтүү оор кылмыштардын катарына киргендиктен, анда Табаракты катаал жаза күтүп турган.

Табарактын айтымында, ал 2016-жылы ата-энеси менен Казакстанга көчүп келип, убактылуу жашап туруу укугуна ээ болгон. 2017-жылы Кытайга окууга барып, ал жактан паспортун алып коюшкан. Мындан улам Казакстанга келе албай, чек арадан мыйзамсыз өтүүгө аргасыз болгон.

Акыркы эки жылдан бери Казакстанда Кытайдан качып келген ондогон адам жоопкерчиликке тартылды. Алар мындай аракеттерин Пекиндин Шинжандагы түрк тилдүү улуттарга карата жүргүзгөн саясаты менен түшүндүрүшкөн.

www.