Бүгүн Зайсан шаарында башталган отурумда күбөлөрдүн көрсөтмөлөрүн угуу уланууда. Ал ортодо соттолуучулардын ондогон тарапташы сот имаратынын алдына чогулуп, «Боштондук» деп кыйкырып жатышканы кабарланууда. Алар Кастер Мусаханулы менен Мурагер Алимулына Казакстанда башпаанек жана жарандык берүүнү талап кылып жатышат.

6-январда сот имаратынын алдына топтолгон адамдардын нааразылыгынын фонунда өткөн отурум бир нече сааттан кийин токтоп, кийинкиге жылдырылган. Анда соттолуучулар кытай бийлиги алардын Шинжаңда калган туугандарына кысым көрсөтүп жатканын билдиришкен.

30 жаштагы Кастер Мусакан менен 25 жаштагы Мурагер Алимулы Шинжаңдан чыгып, 1-октябрда Кытай чек арасынан өткөнүн айтышкан. Камакка алынганга чейин Кастер «саясий тарбиялоочу лагерде камакта отуруп чыкканын», ал эми Мурагер ошол эле лагерде «кыйноого кабылганын» айткан. Алар Казакстандан качкын макамын сурап, Кытайдагы үй-бүлөсүн куугунтуктан коргоону өтүнүшкөн. Камакка алынгандан кийин экөөнө тең «качкын макамын сураган адам» деген макам берилген.

Human Rights Watch жана Amnesty International укук коргоо уюмдары казак бийлигин Кастер Мусаханулы менен Мурагер Алимулыны Кытайга өткөрүп бербөөгө чакырышкан.

Кытайдын Шинжаң аймагында ислам динин туткан, азчылыкты түзгөн улут өкүлдөрү жапырт кармалып, кысымга туш болуп жаткандыгы тууралуу алгачкы маалыматтар 2017-жылы жазында пайда болгон. Анда кытай бийлиги «саясий жактан кайра тарбиялоо» лагерлерин түзүп, аларды күчтөп кармап тургандыгы айтылган. 2019-жылы Бириккен Улуттар Уюму Шинжаңдагы лагерлерде бир миллионго жакын мусулман бар болушу мүмкүндүгүн билдирген. Алгач лагерлер тууралуу маалыматтарды четке каккан Бээжин кийинчерээк алар терроризм менен экстремизмге каршы күрөштүн алкагында ачылган «адистиктерге үйрөтүүчү борборлор» экенин билдирген.