1,241 Бардыгы /

ОШ. Шаардык Кеңештин депутаттарын шайлоонун алдында Кыргызстандын түштүк башкалаасынын жашоочуларынын саны акыркы бир ай ичинде кескин түрдө өстү. Бул жөнүндө Мамлекеттик каттоо кызматынан кабарлашты.

Маселен, 2020-жылдын 1-январынан тартып 11-февралына карата Ош шаарына 33 миң 805 киши катталды. Белгилей кетсек, бул калаада ушул жылдын 12-апрелинде жергиликтүү Кеңештин депутаттары шайланат.

Ал эми Жогорку Кеңеш депутаты Кенжебек Бокоев жергиликтүү шайлоолорго карата жарандарды жасалма каттоолор жүрүп жаткандыгына абдан катуу кабатыр: – Борбордук Шайлоо комиссиясынын мүчөлөрүн, Мамлекеттик каттоо кызматынын өкүлдөрүн Парламентке токтоосуз чакырып, маалыматтарын сөзсүз угалы. Шайлоо өтө турган шаарларга он миңдеп айылдардын тургундары үстөккө-босток катталып жатышат. Ар кандай ыплас жолдор менен добуш сатып алуунун түрлөрүн моминтип ачык эле колдонуп жатышат. Ошолорду токтотуш керек! Болбосо, кенебестикке салсак, мындан акыры сөзсүз жаңжал чыгат!

Буга чейин Жогорку Кеңеште Токмок шаарынын тургундарынын саны кескин түрдө өсүп бараткандыгы айтылган эле.

Алишер ТОКСОНБАЕВ, өз кабарчы